ନବରଙ୍ଗପୁର: ଜିଲ୍ଲା ନନ୍ଦାହାଣ୍ଡି ବ୍ଲକ୍ ସଦର ଗ୍ରାମପଞ୍ଚାୟତ ଅନ୍ତର୍ଗତ ଖୁଣ୍ଟିଆ ଗ୍ରାମରେ ଉଦଯାପିତ ହୋଇଯାଇଛି ଐତିହାସିକ ବାଲିଯାତ୍ରା । ଖୁଣ୍ଟିଆ ଓ କଂସାରୀ ଗୁଡାର ମିଳିତ ଆନୁକୁଲ୍ୟରେ ଆୟୋଜିତ ହୋଇଥାଏ ଏହି ପାରମ୍ପରିକ ବାଲିଯାତ୍ରା । 12ବର୍ଷକୁ ଥରେ ଏହି ଗ୍ରାମରେ ପାଳନ କରା ଯାଇଥାଏ ଏହି ପର୍ବ । ଫସଲ, ଜନସାଧାରଣ ତଥା ଗୃହପାଳିତ ପଶୁ ପକ୍ଷୀଙ୍କ ସୁସ୍ଥ ଜୀବନ ଓ ନିଜ ଜୀବିକା ପାଇଁ ଏହି ଯାତ୍ରା ପାଳନ କରାଯାଉଛି । ଏହି ବାଲିଯାତ୍ରାକୁ ନେଇ ଲୋକଙ୍କ ମଧ୍ୟରେ ଗଭୀର ଆସ୍ଥା ରହିଛି । ଦୀର୍ଘ 17 ଦିନ ଧରି ଚାଲିଥିବା ଏହି ବାଲିଯାତ୍ରାରେ ଜିଲ୍ଲାର ବିଭିନ୍ନ ପ୍ରାନ୍ତରୁ ଶ୍ରଦ୍ଧାଳୁଙ୍କ ଭିଡ଼ ଜମିଥିଲା । ଏହାକୁ ନେଇ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଥିଲା ।
ଏହା ମଧ୍ୟ ପଢନ୍ତୁ-ପୁରୀକୁ ଆସୁଥିବା ଭକ୍ତଙ୍କୁ ମିଳିବ ବଡ ଆଶ୍ୱସ୍ତି, ତିଆରି ଚାଲିଛି ବିଶାଳ ପାର୍କିଂ ଜୋନ
ଦୀର୍ଘ ତିନି ମାସ ଧରି ଏହା ବାଲିଯାତ୍ରା ଆରମ୍ଭ ହୋଇ ଆଜି ମହା ସମାରୋହରେ ସମାପ୍ତ ହୋଇଯାଇଛି । ଗତ ମାର୍ଚ୍ଚ ମାସ 31 ତାରିଖରେ ନୂତନ ଚାଙ୍ଗୁଡ଼ିରେ ବାଲି ସଂଗ୍ରହ କରି ବିହନ ବୁଣି ନଅ ଦିନ ଗୁରୁମାଇନି ଦ୍ଵାରା ପ୍ରତିଦିନ ପୂଜା ପାଠ କରାଯାଉଥିଲା । ବିହନ ଗଜାକୁ ନିତି ହଳଦି ପାଣି ସିଞ୍ଚନ କରାଯାଉଥିଲା । ମୁଖ୍ୟ ପୂଜକ ଭାବେ ମାଧବ ପୂଜାରୀ କାର୍ଯ୍ୟ ସମ୍ପାଦନ କରିଥିଲେ । ମନୋରଞ୍ଜନ ପାଇଁ ରାତ୍ରିରେ ତିନୋଟି ନାଟକ ମଞ୍ଚସ୍ଥ ହୋଇଥିଲା ।
ତେବେ ଆଜି(ରବିବାର) ଶୋଭାଯାତ୍ରାରେ ନବରଙ୍ଗପୁର ବିଧାୟକ ସଦାଶିବ ପ୍ରଧାନୀ, ପୁର୍ବତନ ସାଂସଦ ତଥା ଆଦିବାସୀ ବିକାଶ ପରିଷଦର ଉପଦେଷ୍ଟା ପ୍ରଦୀପ ମାଝୀ, ବ୍ଲକ୍ ଅଧ୍ୟକ୍ଷା ରଶ୍ମିତା ମାଝୀ, ଉପାଧ୍ୟକ୍ଷ ସଦନ ଗୌଡ଼, ଜିଲ୍ଲା ପରିଷଦ ସଭ୍ୟ ଦିବ୍ୟଦାନ ସୁନା ଓ ଅରୁଣ କୁମାର ମିଶ୍ର, ବିଜେପି ରାଜ୍ୟ କାର୍ଯ୍ୟକାରିଣୀ ସଦସ୍ୟ ଗୌରୀ ଶଙ୍କର ମାଝୀ ପ୍ରମୁଖଙ୍କ ସହ ଅନେକ ଲୋକ ପ୍ରତିନିଧି ଓ ମାନ୍ୟଗଣ୍ୟ ବ୍ୟକ୍ତିମାନେ ଉପସ୍ଥିତ ରହିଥିଲେ ।
ଅନ୍ୟପଟେ ସ୍ଥାନୀୟ ପରିଚାଳନା କମିଟି ସଭାପତି ତଥା ପୂର୍ବତନ ବ୍ଲକ୍ ଅଧ୍ୟକ୍ଷ ସନ୍ୟାସୀ ସୌରା ତଥା ଅନ୍ୟ ସଦସ୍ୟ ଭାବେ ପଦଲାମ ନାୟକ, ଲକ୍ଷ୍ମଣ ନାୟକ, ଲାବାନ୍ୟ ସୌରା, ଗଣେଶ ପାଇକ, ପତି ହରିଜନ, ଗଙ୍ଗାଧର ଅମନାତ୍ୟ, ରାଜୁ ସୌରା ଓ ବୁଟୁ ପାଇକ ପ୍ରମୁଖ ବାଲି ଯାତ୍ରାକୁ ସୂଚାରୁ ରୂପେ ପରିଚାଳନା କରିଥିଲେ।
ଇଟିଭି ଭାରତ, ନବରଙ୍ଗପୁର
