ନବରଙ୍ଗପୁର: ଶ୍ରମିକ ମାନଙ୍କୁ କର୍ମ ନିଯୁକ୍ତି କ୍ଷେତ୍ରରେ ନିୟୋଜିତ କରି ବର୍ଷକୁ ୧୦୦ ଦିନର କାର୍ଯ୍ୟ ଯୋଗାଇ ଦେବା ଉଦ୍ଦେଶ୍ୟରେ ପ୍ରସ୍ତୁତ ହୋଇଥିଲା ମହାତ୍ମା ଗାନ୍ଧୀ କର୍ମ ନିଯୁକ୍ତି ଯୋଜନା l ଏହି ଯୋଜନାରେ ପ୍ରତି ପଞ୍ଚାୟତ ଓ ବ୍ଲକ ଅଧିନସ୍ଥ ଯେକୌଣସି ଉନ୍ନତି ମୂଳକ କାର୍ଯ୍ୟ ଖସଡ଼ା ଆର୍ଥିକ ବର୍ଷ ପାଇଁ ପ୍ରସ୍ତୁତ କରାଗଲେ ସ୍ଥାନୀୟ ଜବ କାର୍ଡ ଧାରୀ ଶ୍ରମିକମାନଙ୍କୁ ନିୟୋଜିତ କରାଯାଇ ପାରିବ । ଏହାଦ୍ଵାରା ସେମାନଙ୍କ ଆର୍ଥିକ ଉନ୍ନତି ହେବା ସଙ୍ଗେ ସଙ୍ଗେ ଆଖପାଖ ନିଜ ଅଞ୍ଚଳରେ କାର୍ଯ୍ୟ କ୍ଷେତ୍ରରେ ନିୟୋଜିତ ହୋଇ ରୋଜଗାର କ୍ଷମ ହୋଇପାରିବେ ।
କିଛି ସ୍ଥାନରେ ଯୋଜନାର ବାଟ ମାରଣା କରି ପ୍ରଶାସନ ମଧୁଚନ୍ଦ୍ରିକାରେ ଠିକାଦାର ମେସିନ ସାହାଯ୍ୟରେ ରାତାରାତି କାମ ସାରି ଦେଉଥିବାର ମଧ୍ୟ ନଜର ଆସୁଛି l ଯାହା ଦ୍ବାରା ସ୍ଥାନୀୟ ଲୋକେ କାମ ନ ପାଇ ଦାଦନ ଖଟିବାକୁ ବାହାର ରାଜ୍ୟକୁ ଯାଉଛନ୍ତି । ହେଲେ ନବରଙ୍ଗପୁର ଜିଲ୍ଲାର ନନ୍ଦାହାଣ୍ଡି ବ୍ଲକ ଅନ୍ତର୍ଗତ ରଙ୍ଗପିଆଜ ଗୁଡାରେ ଏକ ଭିନ୍ନ ଦୃଶ୍ୟ ଦେଖିବାକୁ ମିଳିଛି । ଗ୍ରାମରେ ପାଖାପାଖି 40 ପରିବାର ରହୁଥିବା ବେଳେ ଅନେକ କୁଲି ମଜୁରି କରି ପରିବାର ପ୍ରତିପୋଷଣ କରନ୍ତି l ଗ୍ରାମର ଯେକୌଣସି କାମ ହେଉ ନା କାହିଁକି ଗ୍ରାମବାସୀ ମିଳିମିଶି କରିଥାନ୍ତି । ସେପଟେ ବ୍ଲକ ପ୍ରଶାସନ କାମର ବିଲ ଠିକ ସମୟରେ ଦେଇ ପାରିଲେ ସେମାନେ ଉପକୃତ ହୋଇ ପାରିଥାନ୍ତେ ବୋଲି ଶ୍ରମିକମାନେ କହିଛନ୍ତି ।
ଇଟିଭି ଭାରତ, ନବରଙ୍ଗପୁର
