ନବରଙ୍ଗପୁର: ଲଘୁଚାପ ଜନିତ ଲଗାଣ ବର୍ଷା ଯୋଗୁଁ ଜନ ଜୀବନ ଅସ୍ତବ୍ୟସ୍ତ ହୋଇପଡିଛି । ଜିଲ୍ଲାର ବିଭିନ୍ନ ନଦୀରେ ଜଳସ୍ତର ବଢିବା ସହ ଗଛ ଭାଙ୍ଗି ରାସ୍ତା ଅବରୋଧ ହୋଇଛି । ପ୍ରବଳ ବର୍ଷା ପାଣିରେ ଭାସିଯାଇ ଜଣେ ମହିଳାଙ୍କ ମୃତ୍ୟୁ ହୋଇଥିବାବେଳେ କେତେକ ଅଞ୍ଚଳରେ କଚ୍ଚା ଘର ଭାଙ୍ଗି ଯାଇଛି । ସକାଳୁ ଜାରି ରହିଥିବା ଭାରି ବର୍ଷା ଯୋଗୁଁ ନବରଙ୍ଗପୁର ଜିଲ୍ଲା ପାପଡାହାଣ୍ଡି ବ୍ଲକ ସଦର ମହକୁମାର ଟୁରି ନଦୀ ଫୁଲି ଉଠିଛି । ନଦୀ ଉପରେ ଦୁଇ ଫୁଟ ଉଚ୍ଚାତର ପାଣି ପ୍ରବାହିତ ହେଉଛି । ଫଳରେ ନବରଙ୍ଗପୁର ଉମରକୋଟ ଏବଂ ନବରଙ୍ଗପୁର ଠାରୁ ରାୟପୁରକୁ ସମ୍ପୂର୍ଣ୍ଣ ଭାବେ ଯୋଗଯୋଗ ଠପ୍ ହେଇ ପଡିଛି ।
ଏହି ରାସ୍ତାଟି ନବରଙ୍ଗପୁର ଜିଲ୍ଲା ସହ ଉମରକୋଟ ଏବଂ ପଡ଼ୋଶୀ ରାଜ୍ୟ ଛତିଶଗଡ଼ ରାୟପୁରକୁ ସଂଯୋଗ କରିଥାଏ । ରାସ୍ତା ଉପରେ ଦୁଇ ଫୁଟ ଉଚ୍ଚତାର ପାଣି ପ୍ରବାହିତ ହେଉଥିବାରୁ ଯାନବାହାନ ଚଳଚଳରେ ବ୍ୟାଘାତ ସୃଷ୍ଟି ହୋଇଛି । ଫଳରେ ରାସ୍ତାର ଉଭୟ ପାର୍ଶ୍ବରେ ଅଟକି ରହିଛି ଶହଶହ ଗାଡି । ଲଘୁଚାପ ଯୋଗୁଁ ଆଗକୁ ବର୍ଷା ଅଧିକ ହେବାର ସମ୍ଭାବନା ରହିଥିବା ବେଳେ ଟୁରି ନଦୀର ଜଳସ୍ତର ମଧ୍ୟ ବଢିବାକୁ ଲାଗିଲାଣି । ଏଭଳି ଲଗାଣ ବର୍ଷା ଜାରି ରହିଲେ ନଈ କୂଳ ଜନବସତିଙ୍କ ପାଇଁ ସମସ୍ୟା ଦେଖାଦେଇପାରେ ।
ଅନ୍ୟପଟେ ପାପଡାହାଣ୍ଡି ଗ୍ରାମରେ କିଛି ତଳି ଅଞ୍ଚଳର ଘର ଭିତରକୁ ପାଣି ପଶିଛି । ନବରଙ୍ଗପୁର ଠାରୁ ଭବାନୀପାଟଣା ଓ ରାୟପୁରକୁ ସଂଯୋଗ କରୁଥିବା ୨୬ ଜାତୀୟ ରାଜପଥ ଉପରେ ତାରାଗାଁ ନିକଟରେ ଏକ ବିରାଟ ଆମ୍ବ ଗଛ ପଡ଼ିଯିବା ଯୋଗୁଁ ଦୀର୍ଘ ସମୟ ଧରି ଯୋଗାଯୋଗ ବିଚ୍ଛିନ୍ନ ହୋଇଥିଲା । ସେହିପରି ଝରିଗାଁ ବ୍ଳକ ଭଇସବନ୍ଧା ଗ୍ରାମର ପ୍ରତିମା ସାନ୍ତା ଗ୍ରାମ ନିକଟସ୍ଥ ନାଳ ପାର ହେବା ସମୟରେ ପ୍ରଖର ତ୍ସୋତରେ ଭାସି ଯାଇ ତାଙ୍କର ମୃତ୍ୟୁ ହୋଇଛି । ଜିଲ୍ଲାରେ ଅଧିକାଂଶ ବ୍ଲକରେ ଦିନ ତମାମ ପ୍ରବଳ ବର୍ଷା ହୋଇଛି। କିଛି ସ୍ଥାନରେ କଚ୍ଚା ଘର ଗୁଡ଼ିକ ଭାଙ୍ଗିଯାଇଛି । ଅନ୍ୟପକ୍ଷରେ ଜିଲ୍ଲା ଜରୁରୀ କାଳୀନ ଅଧିକାରୀ ମୌସୁମୀ ନାୟ କହିଛନ୍ତି " ଜିଲ୍ଲା ପ୍ରଶାସନ ଲଗାଣ ବର୍ଷା ପରିସ୍ଥିତି ମୁକାବିଲା ପାଇଁ ପ୍ରସ୍ତୁତ ହୋଇ ରହିଛି ।’’
ଇଟିଭି ଭାରତ, ନବରଙ୍ଗପୁର
