ନବରଙ୍ଗପୁର: ଜିଲ୍ଲାରେ ଜାରି ରହିଛି ବର୍ଷା ବିତ୍ପାତ । ଗତକାଲି(ରବିବାର) ଠାରୁ ନିରବଚ୍ଛିନ୍ନ ଭାବେ ବର୍ଷା ଲାଗି ରହିଥିବା ଫଳରେ ନବରଙ୍ଗପୁର ସହରର ବିଭିନ୍ନ ସାହି ମଧ୍ୟରେ ପାଣି ପଶିବା ସହିତ ସହର ମଧ୍ୟରେ ଥିବା ଭାଟିଶାଳଗୁଡା ଓ ଇଚ୍ଛାବତୀ ଗୁଡାରେ ଘର ଗୁଡିକ ଭାଙ୍ଗିପଡିଛି ।
ସାହି ମଧ୍ୟରେ ଥିବା ଘର ଗୁଡିକ ମଧ୍ୟରେ ପାଣି ପଶିବା ଫଳରେ ଆସବାବପତ୍ର ଗୁଡିକ ପାଣିରେ ଭାସୁଛି । ହେଲେ ଲୋକଙ୍କ ନିକଟରେ ପହଞ୍ଚି ନାହିଁ ପ୍ରଶାସନ । ଘରେ ପଶିଯାଇଥିବା ପାଣିକୁ ନିଜେ ନିଜେ ବାହାର କରୁଛନ୍ତି ଲୋକେ । ପ୍ରବଳ ବର୍ଷା ଫଳରେ ଜିଲ୍ଲା ମୁଖ୍ୟଚିକିତ୍ସାଳୟ ଓ କଲେଜକୁ ଯାଇଥିବା ରାସ୍ତା ମଧ୍ୟ ଅବରୋଧ ହୋଇଛି । ସେଭଳି ରାସ୍ତାରେ ନୂତନ ଭାବେ ନିର୍ମିତ କଲଭର୍ଟ ମଧ୍ୟ ଅଧା ଭାଙ୍ଗିଯାଇଛି ।
ଆଉ ଯଦି ଆଗକୁ ଏଭଳି ବର୍ଷା ଲାଗି ରହେ, ତେବେ ସହରର ଅନେକ ସାହି ମଧ୍ୟକୁ ପାଣି ପଶିବା ଆଶଙ୍କା ପ୍ରକାଶ ପାଇଛି । ଯାହାକୁ ନେଇ ଆତଙ୍କିତ ହୋଇପଡିଛନ୍ତି ଲୋକେ । ଅନ୍ୟ ପକ୍ଷରେ ଲୋକଙ୍କ ସମସ୍ୟା ସମ୍ପର୍କରେ ପ୍ରଶାସନ ଅବଗତ ଥାଇ ମଧ୍ୟ କୌଣସି ପଦକ୍ଷେପ ନ ନେଇ ନିରବଦ୍ରଷ୍ଟା ସାଜିଥିବା ଅଭିଯୋଗ କରିଛନ୍ତି ପ୍ରଭାବିତ ଲୋକେ ।
ପ୍ରତିବର୍ଷ ଏଭଳି ସମସ୍ୟା ଉପୁଜୁଥିଲେ ମଧ୍ୟ ପ୍ରଶାସନ କେବଳ ଆଶ୍ବସନା ଦେଇ ଚୁପ ରହୁଥିବା କ୍ଷୋଭର ସହ ପ୍ରକାଶ କରିଛନ୍ତି ସାହିବାସିନ୍ଦା ।
ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
