ନବରଙ୍ଗପୁର: ଜିଲ୍ଲାରେ ମଣ୍ଡିରୁ ଧାନ ନ ଉଠିବା ପ୍ରତିବାଦରେ ଚାଷୀମାନେ ସରୁଗୁଡାଠାରେ ରାସ୍ତାରୋକ କରିବା ସହ ନନ୍ଦାହାଣ୍ଡି ଲ୍ୟାମ୍ପସ କାର୍ଯ୍ୟାଳୟରେ ତାଲା ପକାଇଛନ୍ତି । ଚାଷୀଙ୍କ ଏହି ଆନ୍ଦୋଳନକୁ ସମର୍ଥନ କରି ପୂର୍ବତନ ସାଂସଦ ତଥା ବିଜେପି ନେତା ବଳଭଦ୍ର ମାଝୀ ରାସ୍ତାରୋକରେ ସାମିଲ ହୋଇଛନ୍ତି ।
ଗତ କିଛି ଦିନ ଧରି ମଣ୍ଡିରେ ଟାର୍ଗେଟ ନ ଥିବା କହି ଧାନ ଉଠୁନଥିବାବେଳେ ଚାଷୀ ଧାନକୁ ଘରେ ରଖି ଚିନ୍ତାରେ ପଡିଯାଇଥିଲେ । ଏହି ସମୟରେ ମହାମଣ୍ଡି ଗୁଜବ ହେତୁ ଚାଷୀମାନେ ସରୁଗୁଡା ମଣ୍ଡିରେ ଧାନ ନେଇ ଆସିଥିଲେ । ଯାହା ଫଳରେ ପ୍ରାୟ ୬୦ ହଜାର କ୍ବିଣ୍ଟାଲ ଧାନମଣ୍ଡିରେ ପଡିରହିଛି । ଦୀର୍ଘ ସାତ ଦିନ ଧରି ମଣ୍ଡିରେ ଧାନ ପଡିରହିଥିବା ବେଳେ ଶୀତ କାକର ରାତିରେ ଚାଷୀ ଧାନବସ୍ତାକୁ ଜଗି ରହିଛନ୍ତି । କିନ୍ତୁ ଏପର୍ଯ୍ୟନ୍ତ ମଧ୍ୟ ମଣ୍ଡିରୁ ଧାନ ନ ଉଠିବା ପ୍ରତିବାଦରେ ଚାଷୀମାନେ ବିକ୍ଷୋଭ କରିଛନ୍ତି ।
ଚାଷୀ ଉତ୍ୟକ୍ତ ହୋଇ ଲ୍ୟାମ୍ପ କାର୍ଯ୍ୟାଳୟରେ ତାଲା ପକାଇବା ସହ ସରୁଗୁଡାଠାରେ ନବରଙ୍ଗପୁର ମୁଖ୍ୟାଳୟକୁ ସଂଯୋଗ କରୁଥିବା ରାସ୍ତା ଅବରୋଧ କରିଛନ୍ତି । ଯାହା ଫଳରେ ନବରଙ୍ଗପୁର ମୁଖ୍ୟାଳୟ ସହ ନନ୍ଦାହାଣ୍ଡି ବ୍ଲକ କାର୍ଯ୍ୟାଳୟକୁ ଗମନାଗମନ ବାଧା ପ୍ରାପ୍ତ ହୋଇଛି । ଚାଷୀଙ୍କ ଏହି ଆନ୍ଦୋଳନକୁ ସମର୍ଥନ କରି ପୂର୍ବତନ ସାଂସଦ ତଥା ବିଜେପି ନେତା ବଳଭଦ୍ର ମାଝୀ ରାସ୍ତାରୋକରେ ସାମିଲ ହୋଇଥିବା ଦେଖିବାକୁ ମିଳିଛି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
