ନବରଙ୍ଗପୁର: କୋରୋନାରେ ଆକ୍ରାନ୍ତ ଗର୍ଭବତୀ ମହିଳାଙ୍କୁ ପ୍ରସୂତି କରି ବେଶ୍ ଚର୍ଚ୍ଚାର ପରିସରକୁ ଆସିଛନ୍ତି ନବରଙ୍ଗପୁର ଡାକ୍ତର। ଜିଲ୍ଲାର ପାପଡାହାଣ୍ଡି ବ୍ଲକରେ ଘଟିଛି ଏଭଳି ଏକ ଘଟଣା ଯାହାକି ସମାଜରେ ଉଦାହରଣ ସୃଷ୍ଟି କରିପାରିଛି ।
ପାପଡାହାଣ୍ଡି ବ୍ଲକ ମାଝୀଗୁଡା ପଞ୍ଚାୟତର ଚିକିଲିଆଗୁଡା ଗ୍ରାମର ଜଣେ ମହିଳାଙ୍କର ପ୍ରସବ ଯନ୍ତ୍ରଣା ହେବାରୁ ମଇଦଲପୁର ସ୍ବାସ୍ଥ୍ୟ କେନ୍ଦ୍ରକୁ ପ୍ରସୂତି ସକାଶେ ଆସିଥିଲେ। ପ୍ରଥମେ ଗର୍ଭବତୀ ମହିଳାଙ୍କ କୋରୋନା ପରୀକ୍ଷା କରଯାଇଥିଲା । ପରୀକ୍ଷା ପରେ ପରୀକ୍ଷକ ସତ୍ୟଜିତ ଟାକ୍ରି ମହିଳା ଜଣକ କୋରୋନା ଆକ୍ରାନ୍ତ ଥିବା ସୂଚନା ଦେଇଥିଲେ ।
ମଇଦଲପୁରରେ କାର୍ଯ୍ୟରତ ଡାକ୍ତର ମୋହନ ଦାସଙ୍କୁ ଏନେଇ ସୂଚନା ଦିଆଗଲା । ଗର୍ଭବତୀ ମହିଳାଙ୍କ ପ୍ରସବ ଯନ୍ତ୍ରଣା ଅଧିକ ହେଉଥିବା ଜାଣି ଡାକ୍ତର ମୋହନ ଦାସ ସଙ୍ଗେ ସଙ୍ଗେ ପିପିଇ କିଟ ପିନ୍ଧି ଚିକିତ୍ସାରେ ଲାଗିପଡିଲେ । କିଛି ସମୟ ପରେ ଗର୍ଭବତୀ ମହିଳାଙ୍କର ଗୋଟିଏ ପୁତ୍ର ସନ୍ତାନ ଜନ୍ମ ହୋଇଥିଲା । ଜୀବନକୁ ବାଜି ଲଗାଇ ମଇଦଲପୁର ସ୍ବାସ୍ଥ୍ୟ କେନ୍ଦ୍ରର ମହିଳା ସ୍ବାସ୍ଥ୍ୟକର୍ମୀ ରଶ୍ମିତା ବାଗ ଓ ସହାୟିକା ପଦ୍ମା ଭତ୍ରା ପିପିଇ କିଟ ପିନ୍ଧି ପ୍ରସବ କରାଇବାରେ ଡାକ୍ତରଙ୍କୁ ସହଯୋଗ କରିଥିଲେ। ଏଭଳି କ୍ଷେତ୍ରରେ ସ୍ବାସ୍ଥ୍ୟକର୍ମୀ ଓ ଡାକ୍ତରଙ୍କ କାର୍ଯ୍ୟକୁ ବିଭିନ୍ନ ମହଲରେ ବେଶ୍ ପ୍ରଶଂସା କରାଯାଉଛି ।
ପ୍ରସୂତି ପରେ ମାଆ ଓ ଶିଶୁ ସୁସ୍ଥ ଥିବା ଡାକ୍ତର ସୂଚନା ଦେଇଛନ୍ତି। ପ୍ରସବ ପରେ ମା ଓ ଶିଶୁଙ୍କୁ ତାଙ୍କ ଘରକୁ ପଠାଇ ଦିଆଗଲା ଓ ଘରେ ସଙ୍ଗରୋଧରେ ରହିବାକୁ ପରାମର୍ଶ ଦେଇଛନ୍ତି ଡାକ୍ତର । ତେବେ ଜଣେ ଗର୍ଭବତୀ ମହିଳା ଘରେ ଥିବା ସତ୍ତ୍ବେ କୋରୋନାରେ ଆକ୍ରାନ୍ତ ହେବା ସେହି ଗ୍ରାମର କୋରୋନା ସଂକ୍ରମଣ ଥିବା ପ୍ରତି ସଙ୍କେତ ଦେଇଛି । ଏଣୁ ମାଝୀଗୁଡା ପଞ୍ଚାୟତ ଅନ୍ତର୍ଗତ ଚିକିଲିଆଗୁଡା ଗ୍ରାମକୁ କଣ୍ଟାକ୍ଟ ଟ୍ରେସିଂ କରି କରୋନା ପରୀକ୍ଷା କାରାଯିବାକୁ ସାଧାରଣରେ ଦାବି ହେଉଛି । ଏଥିପ୍ରତି ଜିଲ୍ଲା ସ୍ବାସ୍ଥ୍ୟ ବିଭାଗ ସଜାଗ ହୋଇ କଣ ପଦକ୍ଷେପ ନେଉଛନ୍ତି ତାହା କେବଳ ଦେଖିବାକୁ ବାକି ରହିଲା ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
