ନବରଙ୍ଗପୁର: ବଲିଉଡର ପ୍ରଖ୍ୟାତ ସିନେ ନିର୍ଦ୍ଦେଶକ ରାମ ଗୋପାଳ ବର୍ମାଙ୍କୁ ନେଇ ପୁଣି ତେଜିଲା ବିବାଦ । ତେବେ ଏଥର ସିଧା ଓଡିଶାରୁ ଟାର୍ଗେଟ କରାଯାଇଛି ରାମ ଗୋପାଳଙ୍କୁ । ନବରଙ୍ଗପୁର ଥାନାରେ ତାଙ୍କ ନାଁରେ ଏତଲା ଦେଇଛି ନବରଙ୍ଗପୁର ହିନ୍ଦୁ ଏକତା ବାହିନୀ । ଓଡିଶାର ଅପ୍ସରା-ରକଙ୍କୁ ନେଇ ତାଙ୍କର ଆଗାମୀ ଫିଲ୍ମ ‘ଥ୍ରୀଲର’ରେ ହିନ୍ଦୁ ଦେବାଦେବୀଙ୍କୁ ଅସମ୍ମାନ କରାଯାଇଥିବା ଅଭିଯୋଗ ହୋଇଛି ।
ନବରଙ୍ଗପୁର ହିନ୍ଦୁ ଏକତା ବାହିନୀ ଅଭିଯୋଗ ହେଲା, ରିଲିଜ ହୋଇଥିବା ଟ୍ରେଲରରେ ଓଡିଶାର ଅପ୍ସରାଙ୍କ ମାତ୍ରାଧିକ ଅଙ୍ଗ ପ୍ରଦର୍ଶନ ହୋଇଥିବା ସହିତ ଅଶ୍ଳୀଳ ଦୃଶ୍ୟ ପ୍ରଦର୍ଶନ ସମୟରେ ହିନ୍ଦୁ ଦେବାଦେବୀଙ୍କ ନାମକୁ ବ୍ୟବହାର କରଯାଇଛି । ଚଳଚ୍ଚିତ୍ରର ସେହି ଦୃଶ୍ୟ ସମୟରେ ତୁରନ୍ତ ହିନ୍ଦୁ ଦେବଦେବୀଙ୍କ ନାମକୁ ହଟାଯିବା ଏବଂ ଦୁଇ କଳାକାର ଏବଂ ରାମ ଗୋପାଳ ବର୍ମାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବା ପାଇଁ ଦାବି କରିଛି ନବରଙ୍ଗପୁର ଜିଲ୍ଲା ହିନ୍ଦୁ ଏକତା ବାହିନୀ ।
ସୂଚନାଥାଉ କି, ଓଡ଼ିଆ ନାୟକ ଓ ନାୟିକାଙ୍କୁ ନେଇ ପ୍ରଥମ ଥର ପାଇଁ ନିର୍ଦ୍ଦେଶକ ରାମ ଗୋପାଳ ବର୍ମା ଏକ ହିନ୍ଦୀ ଚଳଚିତ୍ର ନିର୍ମାଣ କରିଛନ୍ତି । ଫିଲ୍ମର ଟାଇଟଲ ଥ୍ରୀଲର ରହିଥିବା ବେଳେ ଅପ୍ସରାଙ୍କ ଅଙ୍ଗଭଙ୍ଗୀକୁ ନେଇ ରାମୁ ଟ୍ବିଟରରେ ପୋଷ୍ଟ ପରେ ଚର୍ଚ୍ଚା ଜୋର ଧରିଥିଲା । ପରେ ଓଡିଶାକୁ ନେଇ ରାମୁଙ୍କ ଟ୍ବିଟ ତାଙ୍କୁ ଆହୁରି ବିବାଦ ଭିତରକୁ ଟାଣି ଆଣିଥିଲା ।
ନବରଙ୍ଗପୁର ଜିଲ୍ଲା ଉମରକୋଟରେ ଜନ୍ମିତ ରକ୍ କାଚି ଓ ନୟାଗଡରେ ଜନ୍ମିତ ଅପ୍ସରା ରାଣୀ ଏହି ଫିଲ୍ମରେ ନାୟକ ନାୟିକା ରହିଛନ୍ତି । ଗତ କିଛି ଦିନ ପୂର୍ବେ ଫିଲ୍ମ ର ଟ୍ରେଲର ରିଲିଜ ହୋଇଥିଲା ଏବଂ ୟୁଟ୍ୟୁବରେ ଅପଲୋଡ଼ ହୋଇଥିଲା । ଏହି ଫିଲ୍ମର କିଛି ଦୃଶ୍ୟରେ ଅଙ୍ଗ ପ୍ରଦର୍ଶନ ସହିତ ସେହି ସମୟରେ ହିନ୍ଦୁ ଦେବା ଦେବୀଙ୍କ ନାମ ନିଆଯାଇଛି । ଯାହାକୁ ନେଇ ତାତି ଉଠିଛି ନବରଙ୍ଗପୁର ହିନ୍ଦୁ ଏକତା ବାହିନୀ ।
ନବରଙ୍ଗପୁରରୁ ତପନ କୁମାର ବିଷୟି, ଇଟିଭି ଭାରତ
