ନବରଙ୍ଗପୁର: ଉଚ୍ଚ ସୁଧର ଲାଳସା ଦେଖାଇ ଏକାଧିକ ଲୋକଙ୍କ ଠାରୁ ଏକ କୋଟିରୁ ଉର୍ଦ୍ଧ୍ବ ଟଙ୍କାର ଠକେଇ ହୋଇଥିବା ଅଭିଯୋଗ ହୋଇଛି । ଏଭଳି ଅଭିଯୋଗ ଆସିଛି ନବରଙ୍ଗପୁରୁ।
ସୂଚନାନୁସାରେ, ନବରଙ୍ଗପୁର ସହରର ଏ ଭେଙ୍କେଟ ରାଓ ଓ ଏ ବାଶୁ ନାମକ ଦୁଇ ବ୍ୟକ୍ତି ଉଚ୍ଚ ସୁଧର ଲାଳସା ଦେଇ ଲୋକଙ୍କ ଠାରୁ ଟଙ୍କା ଠକେଇ କରୁଥିଲେ । ଉଭୟ ଅଭିଯୁକ୍ତ ସମ୍ପର୍କରେ ବାପ-ପୁଅ ବୋଲି ଜଣାପଡିଛି। 2014ରେ ଏମାନେ କିଛି ଲୋକଙ୍କୁ ନେଇ ଏକ ଗ୍ରୁପ କରିଥିଲେ । ଅଧିକ ସୁଧ ନାଁରେ ସେମାନଙ୍କ ଠୁ ଟଙ୍କା ଆଦାୟ କରୁଥିଲେ ଏବଂ ପ୍ରତ୍ୟେକ ମାସର ଏକ ନିର୍ଦ୍ଧିଷ୍ଟ ଦିନରେ ଏହି ଟଙ୍କାକୁ ଗ୍ରୁପର ସଦସ୍ୟ ମଧ୍ୟରୁ ଯାହାକୁ ଆବଶ୍ୟକ ଥିଲା ତାକୁ ଦେଉଥିଲେ । ଏହା ପରେ ଉକ୍ତ ଟଙ୍କାକୁ ସେହି ସଦସ୍ୟ ଠିକ୍ ସମୟରେ ସୁଧ ସହିତ ପୈଠ କରୁଥିଲେ । ଯାହାକୁ ସ୍ଥାନୀୟ ଭାଷାରେ ଚିତିପାଟା ବୋଲି କୁହାଯାଏ ।
ତେବେ ଏହି ଗ୍ରୁପ ସଦସ୍ୟଙ୍କ ଠାରୁ ଆଦାୟ ଟଙ୍କାକୁ ବାପ-ପୁଅ ନିଜ ପାଖରେ ରଖୁଥିଲେ । ଏଭଳି କିଛି ଦିନ ସେମାନଙ୍କ କାରବାର ଠିକ୍ରେ ଚାଲିଥିଲା । କିନ୍ତୁ ଗୋଟିଏ ଦିନ ଉଭୟ ଚତୁରତାର ସହ ଲୋକଙ୍କ ଠାରୁ ଲକ୍ଷାଧିକ ଟଙ୍କା ଆଦାୟ କରି ସେହି ଟଙ୍କାକୁ ନିଜ ଆତ୍ମୀୟ ସ୍ବଜନଙ୍କୁ ପ୍ରଦାନ କରିଥିଲେ । ଏହାପରେ ଆନ୍ଧ୍ରପ୍ରଦେଶରେ ଘର କରି ନବରଙ୍ଗପୁର ସହର ଛାଡି ଚାଲିଯାଇଥିବା ନେଇ ଠକେଇର ଶିକାର ହୋଇଥିବା ଲୋକେ ଅଭିଯୋଗ କରିଛନ୍ତି
ଗତ କିଛି ଦିନ ଉଭୟେ ନବରଙ୍ଗପୁର ସ୍ଥିତ ଗାଦବାଗୁଡ଼ାରେ ଥିବା ନିଜ ଜମିକୁ ବିକ୍ରି କରିବାକୁ ଆସିଥିଲେ । ଯାହାକୁ ଜାଣିପାରି ଲୋକେ ତାଙ୍କୁ ପୋଲିସର ଜିମା ଦେଇଥିଲେ । ସେପଟେ ଉଚ୍ଚ ସୁଧ ପାଇବା ଆଶାରେ ଟଙ୍କା ଦେଇଥିବା ଲୋକେ ନିଜ ଟଙ୍କା ଫେରି ପାଇବାକୁ ଥାନାର ଦ୍ବାରସ୍ଥ ହୋଇଛନ୍ତି । ଘଟଣା ସମ୍ପର୍କରେ ତଦନ୍ତ କରି କାର୍ଯ୍ୟାନୁଷ୍ଠାନ ନିଆଯିବ ବୋଲି ପ୍ରତିଶୃତି ଦେଇଛନ୍ତି ନବରଙ୍ଗପୁର ଥାନା ଅଧିକାରୀ ।
ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
