ନବରଙ୍ଗପୁର: ଗୋଆରେ ଫସିଲେ 12ରୁ ଊର୍ଦ୍ଧ୍ବ ଦାଦନ ଶ୍ରମିକ । ନବରଙ୍ଗପୁର ଜିଲ୍ଲାର ବିଭିନ୍ନ ଅଞ୍ଚଳରୁ ପ୍ରାୟ ୧୨ରୁ ଊର୍ଦ୍ଧ ଦାଦନ ଶ୍ରମିକ କାମ ଅନ୍ବେଷଣରେ ଗୋଆ ଯାଇଥିଲେ । ହେଲେ କୋରୋନା ଜନିତ କଟକଣା ଯୋଗୁଁ ଶ୍ରମିକମାନେ ସେଠାରେ ଫସି ରହିଛନ୍ତି । ଗୋଆରୁ ଫେରିବା ପାଇଁ ଅନ୍ୟ କୌଣସି ଉପାୟ ନଥିବାରୁ ବାଧ୍ୟ ହୋଇ ଗଣମାଧ୍ୟମ ପ୍ରତିନିଧିମାନଙ୍କ ସାହାଯ୍ୟ ଲୋଡିଛନ୍ତି । ଏକ ଭିଡିଓ ଜରିଆରେ ବାର୍ତ୍ତା ଦେଇ ସେମାନଙ୍କୁ ଗୋଆରୁ ଉଦ୍ଧାର କରିବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ନିବେଦନ କରିଛନ୍ତି ।
ତେବେ ଉକ୍ତ ଶ୍ରମିକଙ୍କ ପାଖରେ ଟଙ୍କା ସରିଯାଇଥିବା ବେଳେ କୋରୋନା କଟକଣା ହେତୁ କୌଣସି ଖାଦ୍ୟ ସାମଗ୍ରୀ ମିଳିପାରୁନଥିବାରୁ ସେମାନେ ଦୀର୍ଘ ଦିନ ଧରି ଭୋକ ଉପାସରେ କାଳାତିପାତ କରୁଥିବା କହିଛନ୍ତି । ସରକାରଙ୍କ ସହିତ ଯୋଗାଯୋଗର ଅନ୍ୟ କୌଣସି ଉପାୟ ନ ଥିବାରୁ ତାଙ୍କ ନିକଟରେ ଥିବା ଗଣମାଧ୍ୟମ ପ୍ରତିନିଧିଙ୍କ ନିକଟକୁ ଭିଡିଓ ପଠାଇଛନ୍ତି । ଦାଦନମାନେ ଗୋଆର ମାଡଗାଉଁରେ ଫସି ରହିଛନ୍ତି ।
ମହାମାରୀ କୋରୋନାର ମୁକାବିଲା ପାଇଁ ସାରା ଦେଶ 21ଦିନ ପର୍ଯ୍ୟନ୍ତ ଲକଡାଉନ ଥିବା ବେଳେ ବାହାରେ ପୋଲିସର କଟକଣା ଥିବାରୁ ଦାଦନ ଶ୍ରମିକମାନେ ଭୋକ ଉପାସରେ କାଳାତିପାତ କରୁଥିବା ଦର୍ଶାଇଛନ୍ତି ।
ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
