ନବରଙ୍ଗପୁର: ମୋଟର ସାଇକଲରେ ଆସୁଥିବା ଦମ୍ପତିକୁ ଆମ୍ବୁଲାନ୍ସ ଧକ୍କା ଦେଇଛି । ଦୁର୍ଘଟଣାରେ ସ୍ତ୍ରୀ ଇନ୍ଦୁମତି ସରାବୁଙ୍କ ମୃତ୍ୟୁ ଘଟିଥିବା ବେଳେ ସ୍ୱାମୀ ସୁସ୍ଥ ଅଛନ୍ତି l କୋଶାଗୁମୁଡା ବ୍ଲକ ଅନ୍ତର୍ଗତ ପୂଜାରୀଗୁଡା ଛକ ନିକଟରେ ଦୁର୍ଘଟଣା ଘଟିଥିବା ଜଣାପଡିଛି ।
ଶୁକ୍ରବାର ସକାଳେ କୋଶାଗୁମୁଡା ବ୍ଲକ ଳିମ୍ବଭଟା ଗ୍ରାମର ପ୍ରେମଚନ୍ଦ୍ର ସରାବୁ ଓ ତାଙ୍କ ସ୍ତ୍ରୀ ଇନ୍ଦୁମତୀ ସରାବୁ ନିଜ ମୋଟର ସାଇକଲରେ କୌଣସି କାମ ପାଇଁ ନବରଙ୍ଗପୁରକୁ ଆସୁଥିଲେ l ଅନ୍ୟପଟେ ଏକ ପ୍ରସୂତିକୁ ନେଇ ଗୋଟିଏ ଆମ୍ବୁଲାନ୍ସ ଆସଙ୍ଗା ମେଡିକାଲକୁ ଯାଉଥିବା ବେଳେ ପୂଜାରୀଗୁଡା ଛକ ନିକଟରେ ମୁହାଁମୁହିଁ ଧକ୍କା ହୋଇଥିଲା l ଫଳରେ ଘଟଣାସ୍ଥଳରେ ସ୍ତ୍ରୀ ଗୁରୁତର ହୋଇଥିଲେ l ଏହାପରେ ଆମ୍ବୁଲାନ୍ସ କର୍ମଚାରୀମାନେ ଗୁରୁତର ମହିଳାଙ୍କୁ ସେହି ଆମ୍ବୁଲାନ୍ସରେ ମେଡିକାଲକୁ ନେଇଥିଲେ କିନ୍ତୁ ସେଠାରେ ଉପଯୁକ୍ତ ଚିକିତ୍ସା ହୋଇନପାରିବାରୁ ଆମ୍ବୁଲାନ୍ସ କର୍ମଚାରୀମାନେ ତାଙ୍କୁ ନବରଙ୍ଗପୁର ମେଡିକାଲକୁ ଆଣିଥିଲେ । ସେଠାରେ ଡାକ୍ତର ଇନ୍ଦୁମତିଙ୍କୁ ମୃତ ଘୋଷଣା କରିଥିଲେ । ଆମ୍ବୁଲାନ୍ସ କର୍ମଚାରୀ ଆମ୍ବୁଲାନ୍ସକୁ ନେଇ ନବରଙ୍ଗପୁର ଥାନାରେ ଆତ୍ମସମର୍ପଣ କରିଛନ୍ତି ।
ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
