ରାଇରଙ୍ଗପୁର: ନାବାଳିକାକୁ ଦୁଷ୍କର୍ମ ଓ ଅପହରଣ ଅଭିଯୋଗରେ ଯୁବକ ଗିରଫ । ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ଗ୍ରାମାଞ୍ଚଳ ଥାନା ଅଧୀନସ୍ଥ ଅଞ୍ଚଳରେ ଘଟିଛି ଏହି ଘଟଣା ।
ସୂଚନା ଅନୁଯାୟୀ ନାବାଳିକାକୁ ବର୍ଷେ ପୂର୍ବରୁ ଯୁବକ ଜଣକ ମୋବାଇଲରେ ପ୍ରେମ ଜାଲରେ ଫସାଇଥିଲା । ପରେ ଗର୍ଭବତୀ ହେବା ଜାଣି ଜୀବନରେ ମାରିଦେବା ଉଦ୍ଦେଶ୍ୟରେ ଅପହରଣ କରି ନେଇଥିଲା । ନାବାଳିକା ଘଟଣାକୁ ପ୍ରଘଟ କରିଦେବାରୁ ଅଭିଯୁକ୍ତ ଜଣକ ଗତ 8 ତାରିଖ ଦିନ ନାବାଳିକାକୁ ଅପହରଣ କରି ନେଇଥିଲା କିନ୍ତୁ ସୌଭାଗ୍ୟ ବଶତଃ ପରିବାର ଲୋକେ ନାବାଳିକାକୁ ଭାଲୁବସା ଗ୍ରାମରୁ ଉଦ୍ଧାର କରିଥିଲେ । ନାବାଳିକାଙ୍କ କକା ଗତ ୧୧ ତାରିଖ ଥାନାରେ ଲିଖିତ ଅଭିଯୋଗ କରିବା ପରେ ରାଇରଙ୍ଗପୁର ଗ୍ରାମାଞ୍ଚଳ ପୋଲିସ ପୋକ୍ସୋ ଆଇନ ଅନୁଯାୟୀ ଅଭିଯୁକ୍ତଙ୍କ ବିରୋଧରେ ମାମଲା ରୁଜୁ କରିଥିଲେ ।
ସେପଟେ ରାଇରଙ୍ଗପୁର ଗ୍ରାମାଞ୍ଚଳ ପୋଲିସ ଅଭିଯୁକ୍ତକୁ ଗିରଫ କରି ବାରିପଦା ପୋକ୍ସୋ କୋର୍ଟ ଚାଲାଣ କରିଛି । ଗିରଫ ଯୁବକ ଜଣକ ରାଇରଙ୍ଗପୁର ଗ୍ରାମାଞ୍ଚଳ ଥାନା ଭଳବେଡା ଗ୍ରାମର ମନୋଜ ପାତ୍ର ବୋଲି ଜଣାପଡିଛି ।
ରାଇରଙ୍ଗପୁରରୁ ସଞ୍ଜୟ ପରିଡା,ଇଟିଭି ଭାରତ
