ରାଇରଙ୍ଗପୁର : ସନ୍ଦେହଜନକ ଭାବେ ମହିଳାଙ୍କ ମୃତ୍ୟୁ । ମୟୁରଭଞ୍ଜ ଜିଲ୍ଲା କରଞ୍ଜିଆ ଥାନା ବିଉଁରିଆ ଗ୍ରାମରେ ଜଣେ ମହିଳାଙ୍କ ସନ୍ଦେହଜନକ ଅବସ୍ଥାରେ ମୃତ୍ୟୁ ଘଟିଛି । ଘଟଣା ସ୍ଥଳରେ ପୋଲିସ ପହଞ୍ଚି ତଦନ୍ତ ଜାରି ରଖିଛି ।
ସୂଚନା ଅନୁଯାୟୀ ମୃତ ମହିଳା ଜଣକ ହେଲେ କରଞ୍ଜିଆ ଥାନା ଅନ୍ତର୍ଗତ ବିଉଁରିଆ ଗ୍ରାମର ଶରତ ନାୟକଙ୍କ ସ୍ତ୍ରୀ ରସାବତୀ ନାୟକ । ଘର ନିକଟରେ ଥିବା କଟା ବାଉଁଶ ବୁଦା ପାଖରେ ରସାବତୀ ପଡ଼ିଥିଲେ । ତାଙ୍କୁ ଦେଖି ପଡିଶା ଲୋକେ ତୁରନ୍ତ ତାଙ୍କ ସ୍ବାମୀଙ୍କୁ ଖବର ଦେଇଥିଲେ । ଏହା ପରେ ରସାବତୀଙ୍କ ଦୁଇ ପୁଅ ପହଞ୍ଚି ତାଙ୍କୁ ଘର ଭିତରକୁ ଆଣିଥିଲେ । ତାଙ୍କ ବେକରେ କ୍ଷତ ଚିହ୍ନ ଥିବା ବେଳେ ତାଙ୍କ ମୃତ୍ୟୁ ଘଟିଥିବା ଜାଣିପାରି ପୁଅମାନେ ପୋଲିସକୁ ଖବର ଦେଇଥିଲେ ।
ତେବେ ଘର ଲୋକେ ଏହି ଘଟଣାରେ ସମ୍ପୃକ୍ତ ନଥିବା ପୋଲିସ ପାଖରେ ପ୍ରକାଶ କରିଛନ୍ତି । କରଞ୍ଜିଆ ପୋଲିସ ଘଟଣାସ୍ଥଳରେ ପହଞ୍ଚି ଅଧିକ ଛାନଭିନ କରିବା ସହ ମୃତ ଦେହକୁ ଜବତ କରି ଶବ ବ୍ୟବଚ୍ଛେଦ ପାଇଁ କରଞ୍ଜିଆ ଡାକ୍ତରଖାନା ପଠାଇଛି । ତେବେ ଶବ ବ୍ୟବଛେଦ ପରେ ଘଟଣାର ସତ୍ୟାସତ୍ୟ ସାମନାକୁ ଆସିବ ବୋଲି ପୋଲିସ କହିଛି ।
ରାଇରଙ୍ଗପୁରରୁ ସଞ୍ଜୟ ପରିଡା,ଇଟିଭି ଭାରତ
