କେନ୍ଦୁଝର/ରାଇରଙ୍ଗପୁର: ମୟୂରଭଞ୍ଜ ମୁଣ୍ଡାଠାକୁରାରେ ମଦ ବିକ୍ରି ନେଇ ତାତିଲେ ମହିଳା । ଗାଁରୁ ସମସ୍ତ ମଦ ଦୋକାନ ହଟାଇବା ପାଇଁ 57ରୁ ଊର୍ଦ୍ଧ୍ବ ସ୍ବଂୟ ସହାୟକ ଗୋଷ୍ଠୀ ଶୋଭାଯାତ୍ରା କରିଛନ୍ତି ।
ଗାଁ ପାଖ ରାସ୍ତାକଡରେ ମଦ ଦୋକାନ ଥିବାରୁ ଦୁର୍ଘଟଣା, ମହିଳା ମାନଙ୍କୁ ଅଶ୍ଳୀଳ ଗାଳି ଗୁଲଜ, ଘରର ରୋଜଗାରିଆ ପିଲାମାନେ ମଦ ପିଇ ବୃଦ୍ଧ ବାପ ମା, ସ୍ତ୍ରୀ , ଛୁଆ ପିଲାଙ୍କୁ ମାରପିଟ କରୁଛନ୍ତି । ସଂଧ୍ୟା ହେଲେ ମଦୁଆ ଭୟରେ ତାଟି କବାଟ ପଡିଯାଉଛି । ଝିଅ ,ବୋହୂ ଘରୁ ବାହାରି ପାରୁନାହାନ୍ତି ।
ଏହାକୁ ନେଇ ସ୍ବୟଂ ସହାୟକ ଗୋଷ୍ଠୀର ମହିଳାମାନେ ଉପଜିଲ୍ଲାପାଳ, ବିଡିଓ, ଅବକାରୀ ବିଭାଗକୁ ଲିଖିତ ଦେଲେ ବି କିଛି ସୁଫଳ ମିଳୁ ନଥିବା ଅଭିଯୋଗ କରିଛନ୍ତି। ଜିଲ୍ଲା ପ୍ରଶାସନ ନିଦାବିଷ୍ନୁ ସାଜିଛି । ଅବକାରୀ ବିଭାଗ-ମଦ ବେପାରୀଙ୍କ ମଧୁଚନ୍ଦ୍ରିକାରେ ଗାଁ ଲୋକେ ମଦୁଆଙ୍କ ପ୍ରକୋପରେ ପେଶି ହେଉଥିବାର ଅଭିଯୋଗ ହେଉଛି ।
ସମାନ ଘଟଣା ଦେଖିବାକୁ ମିଳିଛି କେନ୍ଦୁଝର ବଡ଼ବିଲରେ । ମଦକୁ ବିରୋଧ କରି ବଡ଼ବିଲ ୱାର୍ଡ଼ ନଂ ୨ ଦଲକି ବସ୍ତିର ମହିଳା ଆଜି ଏକଜୁଟ ହୋଇ ଆରମ୍ଭ କରିଛନ୍ତି ନିଶା ନିବାରଣ ଅଭିଯାନ । ଦଲକି ବସ୍ତିର ଶତାଧିକ ମହିଳା ଠାକୁରାଣୀ ଅଞ୍ଚଳରେ ଏକ ଶୋଭାଯାତ୍ରାରେ ବାହାରି ବିଭିନ୍ନ ସାହି ପରିକ୍ରମା କରି ମଦ ବନ୍ଦ କରିବାକୁ ଦାବି ଜଣାଇଛନ୍ତି ।
ରାଇରଙ୍ଗପୁରରୁ ସଞ୍ଜୟ ପରିଡା ଓ କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
