ରାଇରଙ୍ଗପୁର: ବିବାହିତା ମହିଳାଙ୍କ ସନ୍ଦେହଜନକ ମୃତ୍ୟୁ। ବାପଘର ପକ୍ଷରୁ ଯୌତୁକ ଜନିତ ହତ୍ୟା ଅଭିଯୋଗ । ପୋଲିସର ଛାନଭିନ ଆରମ୍ଭ। ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ଗ୍ରାମାଞ୍ଚଳ ଥାନା ଆହାରବନ୍ଧ ଗ୍ରାମର ନାୟକ ସାହିରେ ଘଟିଛି ଏଭଳି ଘଟଣା। ମୃତ ମହିଳା ଜଣକ ଗ୍ରାମର ଉପେନ୍ଦ୍ର ବାରିକଙ୍କ ସ୍ତ୍ରୀ ସନ୍ଧ୍ୟାରାଣୀ ବାରିକ ।
ମହିଳାଙ୍କ ମୃତ୍ୟୁ ଖବର ପାଇ ବାପଘର ଲୋକେ ଝିଅକୁ ହତ୍ୟା କରାଯାଇଥିବାର ଥାନାରେ ଅଭିଯୋଗ କରିଥିଲେ । ପରେ ପୋଲିସ ଘଟଣାସ୍ଥଳରେ ପହଞ୍ଚି ମହିଳାଙ୍କ ମୃତଦେହ ପଲଙ୍କ ଉପରେ ପଡିଥିବାର ଦେଖିବାକୁ ପାଇଥିଲା । ତେବେ ମହିଳା ଜଣଙ୍କ ଘର ଭିତର ପଟୁ କବାଟ ଦେଇ ଶାଢୀରେ ଆତ୍ମହତ୍ୟା କରିଥିଲେ ପରେ ଆଣି ଜାଣିପାରି କବାଟ ଭାଙ୍ଗି ମୃତଦେହକୁ ପଲଙ୍କ ଉପରେ ଶୁଆଇଥିବା କହିଛନ୍ତି ଶାଶୂଘର ଲୋକେ ।
ସେପଟେ ଯୌତୁକ ପାଇଁ ଝିଅକୁ ଶାଶୂଘର ଲୋକେ ଶାରୀରିକ ଓ ମାନସିକ ନିର୍ଯ୍ୟାତନା ଦେଉଥିଲେ । ଯୌତୁକ ନମିଳିବାରୁ ତାଙ୍କୁ ମାରିଦେଇଛନ୍ତି ବୋଲି ଥାନାରେ ଅଭିଯୋଗ କରିଛନ୍ତି ମହିଳାଙ୍କ ବାପା । ଝିଅର ମୃତ୍ୟୁକୁ ନେଇ ଝିଅର ସ୍ବାମୀ, ଶାଶୂ, ଶ୍ବଶୁର, ନଣନ୍ଦ ଓ ନଣନ୍ଦେଇଙ୍କ ନାଁରେ ସେ ଥାନାରେ ଅଭିଯୋଗ କରିଛନ୍ତି।
ଏନେଇ ରାଇରଙ୍ଗପୁର ଗ୍ରାମାଞ୍ଚଳ ଥାନା ଅଧିକାରୀ ଘଟଣାର ଛାନଭିନ ଆରମ୍ଭ କରି ଅଧିକ ତଦନ୍ତ ପାଇଁ ବାରିପଦାରୁ ସାଇଣ୍ଟିଫିକ୍ ଟିମକୁ ଡକାଇ ଥିବା ଜଣାପଡିଛି। ସେପଟେ ମାଜିଷ୍ଟ୍ରେଟ ଭାବେ ରାଇରଙ୍ଗପୁର ଅତିରିକ୍ତ ଜିଲ୍ଲାପାଳ ଆସି ପରିବାର ଓ ବାପ ଘର ଲୋକଙ୍କ ବୟାନ ରେକର୍ଡ କରିଛନ୍ତି।
ତେବେ ମୃତ ମହିଳାଙ୍କ ସ୍ବାମୀ ଚେନ୍ନାଇରେ ଥିବା ବେଳେ ଘରେ ତାଙ୍କର ଏକମାତ୍ର ଅଢେଇ ବର୍ଷର ଶିଶୁ ପୁତ୍ର ଓ ଶାଶୂ-ଶ୍ବଶୁର ଥିବା ଜଣାପଡିଛି।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
