ବାରିପଦା : ମହିଳାଙ୍କୁ ମରଣାନ୍ତକ ଆକ୍ରମଣ । ତଣ୍ଟି କାଟି ରାସ୍ତା କଡରେ ଫିଙ୍ଗି ଦେଲେ ଦୁର୍ବୃତ୍ତ । ଏଭଳି ଘଟଣା ଘଟିଛି ମୟୂରଭଞ୍ଜ ଜିଲ୍ଲା ମୋରଡ଼ା ଥାନା ଅସ୍ତିଆ ଗ୍ରାମରେ । ସୂଚନାନୁସାରେ ମୋରଡା ଥାନା ତଥା ଚିତ୍ରଡା ଫାଣ୍ଡି ଅଧିନ ଅସ୍ତିଆ ନିକଟ ଏକ ନିଛାଟିଆ ସ୍ଥାନରେ ଗୀତାରାଣୀ ହାଁସଦା ନାମକ ମହିଳା ଗୁରୁତର ଅବସ୍ଥାରେ ବୁଦା ମୂଳରେ ପଡିଥିଲେ । ଏହାଦେଖି ସ୍ଥାନୀୟ ଲୋକେ ପୋଲିସକୁ ଖବର ଦେଇଥିଲେ ।
ଖବରପାଇ ମୋରଡା ଥାନା ଏବଂ ଚିତ୍ରଡା ଫାଣ୍ଡି ପୋଲିସ ଘଟଣାସ୍ଥଳରେ ପହଞ୍ଚି ପ୍ରଥମେ ଗୁରୁତର ମହିଳାଙ୍କୁ ଉଦ୍ଧାର କରିଥିଲେ । ପରେ ଚିକିତ୍ସା ନିମନ୍ତେ ଦମକଳ ଗାଡ଼ିରେ ନିକଟସ୍ଥ କିଶାନତାଣ୍ଡି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନେଇଥିଲେ । ତେବେ ସେଠାରେ ସମ୍ପୃକ୍ତ ମହିଳାଙ୍କ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ପ୍ରାଥମିକ ଚିକିତ୍ସା କରି ପରେ ପଣ୍ଡିତ ରଘୁନାଥ ମୁର୍ମୁ ମେଡିକାଲ କଲେଜ ଆଣ୍ଡ ହସ୍ପିଟାଲରେ ଭର୍ତ୍ତି କରିଥିଲେ ।
ତେବେ ମହିଳାଙ୍କ ବେକକୁ କେହି ଜଣେ ଏକ ଧାରୁଆ ଅସ୍ତ୍ରରେ କାଟିଥିବା ଜଣାପଡ଼ିଛି । ଏବେବି ମହିଳାଙ୍କ ଅବସ୍ଥା ସଙ୍କଟାପନ୍ନ ରହିଛି । ଉକ୍ତ ମହିଳାଙ୍କ ଶ୍ୱଶୁର ଘର ମାଣିଦା ଅଞ୍ଚଳରେ ଏବଂ ବାପଘର ରାଣୀଭୋଳ ଅଞ୍ଚଳରେ ବୋଲି ଗୀତାରାଣୀ ପୋଲିସ ନିକଟରେ ପ୍ରକାଶ କରିଛନ୍ତି । ଏ ସମ୍ପର୍କରେ ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଜାରି ରଖିଛି ।
ଇଟିଭି ଭାରତ, ମୟୂରଭଞ୍ଜ
