ରାଇରଙ୍ଗପୁର: ମୟୂରଭଞ୍ଜ ଜିଲ୍ଲାର ପୃଥକ ପୃଥକ ଦୁଇଟି ସ୍ଥାନରେ ଦନ୍ତା ହାତୀ ଆକ୍ରମଣ । ଆକ୍ରମଣରେ ଚାଲିଗଲା ଦୁଇ ନିରୀହ ଜୀବନ । ତେବେ ମୟୂରଭଞ୍ଜ ଜିଲ୍ଲା କରଞ୍ଜିଆ ବନଖଣ୍ଡ ଅନ୍ତର୍ଗତ ରରୁଆଁ ବ୍ଲକ ବାଟିସାହି ଗାଁରେ ଗତକାଲି ବିଳମ୍ବିତ ପ୍ରଥମ ଘଟଣା ଦେଥିବାକୁ ମିଳିଛି। ନରହନ୍ତା ହାତୀ ରୁଟିଆ ହେମ୍ବ୍ରମ ନାମକ ଜଣେ ୭୪ ବର୍ଷର ବୃଦ୍ଧଙ୍କୁ କବାଟ ଭାଙ୍ଗି ଘର ଭିତରକୁ ପଶି ଦଳି ମାରି ଦେଇଥିବା ଘଟଣା ସାମ୍ନାକୁ ଆସିଛି । ଘଟଣାସ୍ଥଳରେ ରୁଟିଆଙ୍କ ମୃତ୍ୟୁ ଘଟିଥିବା ବେଳେ ମୃତକଙ୍କ ସ୍ତ୍ରୀ ସେଠାରୁ କୌଣସି ମତେ ଖସି ପଳାଇ ଯାଇଥିବାରୁ ଅଳ୍ପକେ ବର୍ତ୍ତି ଯାଇଥିଲେ ।
ତେବେ ରୁଟିଆ ଘରୁ ବାହାରକୁ ଆସି ପାରିନଥିଲେ ଏବଂ ହାତୀ ଆକ୍ରମଣର ଶୀକାର ହୋଇଥିଲେ। ଖବର ପାଇ ଘଟଣାସ୍ଥଳରେ ରୁଟିଆ ଥାନା ପୋଲିସ ଓ ବନବିଭାଗର ଟିମ ପହଞ୍ଚି ମୃତଦେହ କୁ ଉଦ୍ଧାର କରିଥିଲେ। ଏହାସହ ମୃତଦେହ ବ୍ୟବଚ୍ଛେଦ ପାଇଁ କରଞ୍ଜିଆ ଉପଖଣ୍ଡ ଚିକିତ୍ସାଳୟକୁ ପଠାଇଥିଲେ। ବ୍ୟବଚ୍ଛେଦ ପରେ ତାଙ୍କ ପରିବାରକୁ ମୃତଦେହ ହସ୍ତାନ୍ତର କରା ଯାଇଥିବାର ସୂଚନା ମିଳିଛି। ତା ସହିତ ସ୍ଥାନୀୟ ରରୁଆଁ ବନ ଅଧିକାରୀ, ରେଞ୍ଜ ଅଫିସର ଏବଂ ଯଶିପୁର ଥାନା ଅଧିକାରୀ ମୃତକଙ୍କ ଘରକୁ ପହଞ୍ଚି ଆଂଶିକ ସରକାରୀ ସାହାଯ୍ୟ ରାଶି ମୃତକଙ୍କ ପରିବାରକୁ ପ୍ରଦାନ କରିଛନ୍ତି ।
ଏଠାରେ ସୂଚନାଯୋଗ୍ୟ ଯେ, କରଞ୍ଜିଆ ବନଖଣ୍ଡ ରେ ହାତୀପଲ ଉପଦ୍ରବ ଦୀର୍ଘ ଦିନ ଧରି ଚାଲିବା ପରେ କିଛି ଦିନ ବନ୍ଦ ହୋଇ ଯାଇଥିଲା। ଏହି ବର୍ଷ ଏହି ବନଖଣ୍ଡ ରୁ ହାତୀ ଆକ୍ରମଣରେ ୪ ଜଣଙ୍କ ମୃତ୍ୟୁ ଘଟିଥିବା ବେଳେ ୩ ରୁ ୪ ଜଣ ଆହତ ହୋଇଛନ୍ତି। ବନ ବିଭାଗ ଯେତେ ପ୍ରୟାସ କଲେ ମଧ୍ୟ ସେମାନଙ୍କୁ ସ୍ଥାୟୀ ଭାବେ ଘଉଡ଼ାଇବାରେ ସକ୍ଷମ ହୋଇ ପାରୁ ନାହାନ୍ତି ।
