ବାରିପଦା: ଟଙ୍କା ହେଲା କାଳ। ଟଙ୍କା ପାଇଁ ସାଙ୍ଗ ନେଲା ସାଙ୍ଗର ଜୀବନ। ସାଙ୍ଗର ତଣ୍ଟିଚିପି ହତ୍ୟା କଲେ ଦୁଇସାଙ୍ଗ। ଉଧାର ଟଙ୍କା ଫେରସ୍ତ ମାଗି ବିଫଳ ହେବାରୁ ରାଗରେ ଦୁଇସାଙ୍ଗ ମିଶି ଆଉଜଣେ ସାଙ୍ଗର ତଣ୍ଟିଚିପି ନିର୍ମମ ଭାବେ ହତ୍ୟା କରିଛନ୍ତି । ଏଭଳି ଅଭାବନୀୟ ଘଟଣା ବାରିପଦା ସହରରେ ଘଟିଛି ।
ସୂଚନା ଅନୁଯାୟୀ, ବାରିପଦା ସହର ସୁନଗଡିଆ ଅଞ୍ଚଳର ବିକ୍ରମ ଦାସ(୩୭) ବିଭିନ୍ନ ସମୟରେ ସାଙ୍ଗ ଜିତେନ୍ଦ୍ର ପଣ୍ଡା(୩୪)ଙ୍କୁ ଟଙ୍କା ଉଧାର ମାଗି ନେଇଥାନ୍ତି । ମାତ୍ର ଉଧାରଟଙ୍କା ଆଉ ଫେରସ୍ତ କରନ୍ତି ନାହିଁ । ଫଳରେ ବିକ୍ରମ ଓ ଜିତେନ୍ଦ୍ରଙ୍କ ମଧ୍ୟରେ ବିଭିନ୍ନ ସମୟରେ ବଚସା ହୋଇଥାଏ । ତେବେ ଉଧାର ଟଙ୍କାକୁ ନେଇ ବାରିପଦା ସହର କୃଷ୍ଣଚନ୍ଦ୍ର ଗୋଲେଇ ନିକଟରେ ଶୁକ୍ରବାର ଅପରାହ୍ନରେ ଜିତେନ୍ଦ୍ର ଓ ବିକ୍ରମଙ୍କ ମଧ୍ୟରେ ପ୍ରବଳ ବଚସା ହୋଇଥିଲା । ପରେପରେ ଜିତେନ୍ଦ୍ର ତାଙ୍କ ସାଙ୍ଗ ୱାର୍ଡନମ୍ବର ୭ ର ଚନ୍ଦନ କୁମାର ଦାସ(୩୫)ଙ୍କ ସହ ମିଶି ବିକ୍ରମର ତଣ୍ଟିଚିପି ହତ୍ୟା କରି ସେଠାରେ ବିକ୍ରମର ମୃତଦେହକୁ ଫିଙ୍ଗି ଦେଇଥିଲେ ।
ଘଟଣା ସମ୍ପର୍କରେ କୌଣସି ସୂତ୍ରରୁ ଖବରପାଇ ଘଟଣାସ୍ଥଳରେ ବାରିପଦା ଟାଉନ ପୋଲିସ ପହଞ୍ଚି ମୃତଦେହ ଜବତକରିବା ସହିତ ଏକ ମାମଲା ରୁଜୁ କରି ବ୍ୟବଚ୍ଛେଦ ପାଇଁ ପଠାଇ ଘଟଣାର ଅଧିକ ତଦନ୍ତ କରିଥିଲା ।
ତେବେ ଏହା ଏକ ହତ୍ୟା ଘଟଣା ବୋଲି ଜଣାପଡିବା ପରେ ବାରିପଦା ଟାଉନଥାନା ପକ୍ଷରୁ ୩୦୨ ଦଫାରେ ୬୧୯/୨୦ ନଂ ମାମଲା ରୁଜୁ ହୋଇ ଅଭିଯୁକ୍ତଙ୍କୁ ହତ୍ୟାକାରୀ ଦୁଇ ସାଙ୍ଗକୁ ପୋଲିସ ଗିରଫ କରିଥିଲେ। ଗିରଫ ଅଭିଯୁକ୍ତମାନେ ପୋଲିସ ସମ୍ମୁଖରେ ହତ୍ୟା କରିଥିବା ସ୍ବୀକାର କରିଥିଲେ। ଉଭୟ ଅଭିଯୁକ୍ତଙ୍କୁ ଗିରଫ କରି କୋର୍ଟଚାଲାଣ କରିଛି ପୋଲିସ ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
