ରାଇରଙ୍ଗପୁର: ମୟୂରଭଞ୍ଜରେ ସଡକ ଦୁର୍ଘଟଣା । ଭାରସାମ୍ୟ ହରାଇ ସିମେଣ୍ଟ ଖୁଣ୍ଟରେ ପିଟି ହେଲା ବାଇକ । ଦୁଇ ଭାଇଙ୍କର ଏକା ସାଙ୍ଗର ମୃତ୍ୟୁ ହୋଇଥିବା ସୂଚନା । ଏଭଳି ଅଭାବନୀୟ ଘଟଣା ଘଟିଛି ଉଦଳା ଥାନା ଅନ୍ତର୍ଗତ କୁଶଳଦା ଛକ ନିକଟରେ । ଦୁଇ ମୃତକ ଭାଇ ହେଉଛନ୍ତି କୁଶଳଦା ଗ୍ରାମର ଦୁଇ ଭାଇ ଶରତ ସିଂ ଏବଂ ରାମଚନ୍ଦ୍ର ସିଂ ।
ମିଳିଥିବା ସୂଚନା ଅନୁଯାୟୀ, ଗତକାଲି ଦୁଇ ଭାଇ ଶରତ ଏବଂ ରାମଚନ୍ଦ୍ର ଜଣେ ସହଯୋଗୀଙ୍କ ସହିତ କୌଣସି କାମରେ ବାଇକ ଯୋଗେ ବାହାରକୁ ଯାଇଥିଲେ । କାମ ସାରି ଅପରାହ୍ନ ସମୟରେ ବାଇକ ଯୋଗେ ତିନି ଜଣ ନିଜ ଘରକୁ ଫେରୁଥିଲେ । ଏହି ସମୟରେ ହଠାତ ଭାରସାମ୍ୟ ହରାଇ ବାଇକଟି ଏକ ସିମେଣ୍ଟ ଖୁଣ୍ଟକୁ ଧକ୍କା ଦେଇଥିଲା । ଫଳରେ ତିନି ଜଣ ରକ୍ତାକ୍ତ ଅବସ୍ଥାରେ ଘଟଣାସ୍ଥଳରେ ପଡି ରହିଥିଲେ । ପରେ ସ୍ଥାନୀୟ ଲୋକେ ଘଟଣାସ୍ଥଳେ ପହଞ୍ଚି ଆହତ ତିନି ଜଣଙ୍କୁ ଉଦ୍ଧାର କରି ଚିକିତ୍ସା ନିମନ୍ତେ ଖୁଣ୍ଟା ଡାକ୍ତରଖାନାରେ ଭର୍ତ୍ତି କରିଥିଲେ । ହେଲେ ସେଠାରେ ଡାକ୍ତର ଦୁଇ ଭାଇ ଶରତ ସିଂ ଏବଂ ରାମଚନ୍ଦ୍ର ସିଂଙ୍କୁ ମୃତ ଘୋଷଣା କରିଥିଲେ । ଏବଂ ଅନ୍ୟ ଜଣେ ଯୁବକ ଗୁରୁତର ଥିବା ସୂଚନା ଦେଇଥିଲେ । ଗୁରୁତର ଯୁବକ ଜଣକ କୁଶଳଦା ଗ୍ରାମର ଗଗନ ମାରାଣ୍ଡି ବୋଲି ଜଣାପଡିଛି ।
ଦୁର୍ଘଟଣା ସମ୍ପର୍କରେ ସୂଚନା ପାଇବା ପରେ ଉଦଳା ଥାନା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିବା ବେଳେ ଦୁଇ ଭାଇଙ୍କ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ମେଡିକାଲକୁ ପଠାଇଥିଲା । ଆଜି ଦୁଇ ଭାଇଙ୍କ ମୃତଦେହ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯିବ ବୋଲି ପୋଲିସ ପକ୍ଷରୁ ଗତକାଲି କୁହାଯାଇଥିଲା । ତେବେ ଦୁଇ ଭାଇଙ୍କ ମୃତ୍ୟୁ ପରେ ପରିବାରରେ ଶୋକର ଛାୟା ଖେଳିଯାଇଛି ।
ଗତ 6 ତାରିଖ ଦିନ କଳାହାଣ୍ଡିରେ ପିକଅପ ଭ୍ୟାନ ଓ ବାଇକ ମଧ୍ୟରେ ମୁହାଁମୁହିଁ ଧକ୍କା ହୋଇଥିଲା । ଫଳରେ ଘଟଣା ସ୍ଥଳରେ ଜଣଙ୍କ ମୃତ୍ୟୁ ହୋଇଥିବା ଅନ୍ୟ ଜଣଙ୍କୁ ଗୁରୁତର ଅବସ୍ଥାରେ ଭବାନୀପାଟଣା ମେଡିକାଲରେ ଭର୍ତ୍ତି କରାଯାଇଥିଲା । ହେଲେ ସେଠାରେ ଚିକିତ୍ସାଧିନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିବା ବେଳେ କ୍ଷତିପୂରଣ ଦାବିରେ ଜାତୀୟ ରାଜପଥ ଅବରୋଧ କରିଥିଲେ ପରିବାର ଓ ଗ୍ରାମବାସୀ ।
ଇଟିଭି ଭାରତ, ରାଇରଙ୍ଗପୁର
