ବାରିପଦା: ମୟୂରଭଞ୍ଜ ଜିଲ୍ଲା ରାସଗୋବିନ୍ଦପୁର ଥାନା ବୋଧି ଛକ ନିକଟରେ ସଡକ ଦୁର୍ଘଟଣାରେ ଜଣେ ମୃତ, ଜଣେ ଗୁରୁତର । ମୃତ୍ୟୁବରଣ କରିଥିବା ବ୍ୟକ୍ତିଙ୍କ ପରିବାରକୁ କ୍ଷତିପୂରଣ ଦାବିରେ ବଡାମପୁର ଗ୍ରାମବାସୀ ଫାଣ୍ଡି ସମ୍ମାରେ ରାସ୍ତା ଅବରୋଧ କରିଥିଲେ ।
ରାସ୍ତାକଡରେ ଛିଡ଼ା ହୋଇଥିବା ଲୋକଙ୍କ ଉପରେ ମାଡିଗଲା ଇଟା ବୋଝେଇ ଟ୍ରକ । ଏଥିରେ ବଡାମପୁର ଗ୍ରାମର ପଦ୍ମଲୋଚନ ପଣ୍ଡା ଘଟଣାସ୍ଥଳରେ ମୃତ୍ୟୁବରଣ କରିଥିଲାବେଳେ ରାଜୁ ଆହତ ହୋଇଛନ୍ତି । ତେବେ ଟ୍ରକଟି ଦୁର୍ଘଟଣା ଘଟାଇବା ପରେ ଖସି ଯିବାକୁ ଚେଷ୍ଟା କରୁଥିବାବେଳେ ଉତ୍ତ୍ୟକ୍ତ ଲୋକେ ଟ୍ରକଟିକୁ ମାଣିଦା ଛକ ନିକଟରେ ଅଟକାଇ ଥିଲେ । ଦୁର୍ଘଟଣା ଘଟାଇଥିବା ଟ୍ରକ ଡ୍ରାଇଭର ଘଟଣା ସ୍ଥଳରୁ ଖସିଯିବାବେଳେ ଲୋକେ ଡ୍ରାଇଭରକୁ ଧରି ମାଡ ମାରିଥିଲେ । ତେବେ ବଡାମପୁର ଫାଣ୍ଡି ଅଧିକାରୀ ବଲ୍ଲଭ ଚନ୍ଦ୍ର ରାଉତ ଡ୍ରାଇଭରକୁ ଘଟଣାସ୍ଥଳରୁ ଫେରାର କରାଇବା ପାଇଁ ଚେଷ୍ଟା କରୁଥିବା ଅଭିଯୋଗ କରିଛନ୍ତି ଅଞ୍ଚଳବାସୀ ।
ଫାଣ୍ଡି ଅଧିକାରୀଙ୍କୁ ତୁରନ୍ତ ନିଲମ୍ବିତ କରିବା ସହ ଦୁର୍ଘଟଣାରେ ମୃତ୍ୟୁବରଣ କରିଥିବା ବ୍ୟକ୍ତିଙ୍କ ପରିବାର ବର୍ଗକୁ କ୍ଷତିପୂରଣ ଦାବିରେ ବଡାମପୁର ଗ୍ରାମବାସୀ ଫାଣ୍ଡି ସମ୍ମାରେ ରାସ୍ତା ଅବରୋଧ କରିଥିଲେ । ବୈଶିଙ୍ଗା-ଝିଙ୍କିରିଆ ରାସ୍ତା ଅବୋରଧ ଫଳରେ ଦୀର୍ଘ ସମୟ ଧରି ଯାନବାହାନ ଚଳାଚଳ ବନ୍ଦ ରହିଛି । ଘଟଣାସ୍ଥଳରେ ଉତ୍ତେଜନା ଦେଖାଦେଇଥିବାରୁ ପୋଲିସ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରୁଛି ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
