ବାରିପଦା: ଆଦିବାସୀ ଛାତ୍ରଙ୍କ ନାଁରେ କୋଟି କୋଟି ଟଙ୍କାର ଷ୍ଟଡି ଲୋନ କରି ଟଙ୍କା ଆତ୍ମସାତ ଅଭିଯୋଗ । ମୟୂରଭଞ୍ଜ ଜିଲ୍ଲା ମୋରଡା ବ୍ଲକ ପାଟପୁରରେ ଥିବା ଘରୋଇ ଇଞ୍ଜିନିଅରିଂ କଲେଜର ଛାତ୍ରମାନେ କଲେଜ କର୍ତ୍ତୃପକ୍ଷଙ୍କ ବିରୋଧରେ ଏଭଳି ଅଭିଯୋଗ ଆଣିଛନ୍ତି । ଏସଏସବି ରିଜିଓନାଲ ଇନ୍ଷ୍ଟିଟ୍ୟୁସନ ଅଫ ସାଇନ୍ସ ଆଣ୍ଡ ଟେକ୍ନୋଲୋଜିରେ ପାଠ ପଢ଼ୁଥିବା ଛାତ୍ରମାନେ ଥାନାକୁ ଯାଇ ଏହି ଘଟଣାର ତଦନ୍ତ କରିଛନ୍ତି ।
ସୂଚନା ଅନୁସାରେ ସୋମବାର ଛାତ୍ରମାନେ ବାରିପଦା ସ୍ଥିତ ବିଜୟା ବ୍ୟାଙ୍କରୁ ନିଜ ବ୍ୟାଙ୍କ ଷ୍ଟେଟମେଣ୍ଟରୁ ଜାଣିବାକୁ ପାଇଥିଲେ ଯେ ସେମାନଙ୍କ ନାଁରେ କଲେଜ କର୍ତ୍ତୃପକ୍ଷ ଅଜାଣତରେ ବ୍ୟାଙ୍କରୁ ଷ୍ଟଡି ଲୋନ କରି ଟଙ୍କା ଆତ୍ମସାତ କରିଛନ୍ତି । ବାରିପଦାରୁ ଛାତ୍ରମାନେ ଫେରିବା ପରେ କଲେଜ କର୍ତ୍ତୃପକ୍ଷ ଛାତ୍ରମାନଙ୍କୁ କଲେଜକୁ ପ୍ରବେଶ ଅନୁମତି ଦେଇ ନଥିଲେ । ଯାହା ଫଳରେ ୫୦ରୁ ଊର୍ଦ୍ଧ୍ବ ଛାତ୍ର ଗତକାଲି ରାତିରେ ୫ କିଲୋମିଟର ବର୍ଷାରେ ଭିଜି ଭିଜି ମୋରଡା ଥାନାକୁ ପହଞ୍ଚିଥିଲେ । ଥାନାରେ ପହଞ୍ଚି ଛାତ୍ରମାନେ କଲେଜ କର୍ତ୍ତୃପକ୍ଷଙ୍କ ନାଁରେରେ ଏତଲା ଦେଇଥିଲେ ଏବଂ ଘଟଣାର ତଦନ୍ତ କରି ନ୍ୟାୟ ମାଗିଥିଲେ ।
ଅଭଯୋଗ ପରେ ମୋରଡା ଥାନାରେ ପହଞ୍ଚିଥିଲେ ଏସଏସବି ରିଜିଓନାଲ ଇନ୍ଷ୍ଟିଟ୍ୟୁସନ ଅଫ ସାଇନ୍ସ ଆଣ୍ଡ ଟେକ୍ନୋଲୋଜିର ନିର୍ଦ୍ଦେଶକ । ତେବେ ଛାତ୍ରଙ୍କ ସହ ଏ ବାବଦରେ ଆଲୋଚନା ବଦଳରେ ଛାତ୍ରଙ୍କୁ କଲେଜ ହଷ୍ଟେଲରୁ ବହିଷ୍କାର କରିଦିଆଯାଇଛି ବୋଲି କହି ଥାନାରୁ ଚାଲିଯାଇଥିଲେ । ତେବେ ବିଳମ୍ବିତ ରାତି ପ୍ରାୟ ୨ ଟାରେ ଥାନା ଅଧିକାରୀଙ୍କ ସହଯୋଗରେ ଛାତ୍ରମାନଙ୍କୁ ଆଣି କଲେଜ ହଷ୍ଟେଲରେ ଛାଡି ଦେଇଥିବା ଜଣାପଡିଛି । ଛାତ୍ରମାନଙ୍କ ଅଭିଯୋଗ କଲେଜ କର୍ତ୍ତୃପକ୍ଷ ଖଣ୍ଡନ କରିଥିବାବେଳେ କଲେଜ ପକ୍ଷରୁ କୌଣସି ଛାତ୍ରଙ୍କ ନାଁରେ ଷ୍ଟଡି ଲୋନ ଉଠାଯାଇନାହିଁ ବୋଲି ସଫେଇ ଦେଇଛନ୍ତି । ଏଠି ପ୍ରଶ୍ନ ଉଠୁଛି ଯେ କିଏ ଠିକ ଆଉ କିଏ ଭୁଲ । କଲେଜ ଛାତ୍ର ନା କଲେଜ କର୍ତ୍ତୃପକ୍ଷ । ପୁରା ଘଟଣାର ପୁଙ୍ଖାନୁପୁଙ୍ଖ ତଦନ୍ତ ପରେ ପ୍ରକୃତ ତଥ୍ୟ ପଦାକୁ ଆସିବ ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
