ବାରିପଦା: ଶିମିଳିପାଳ ଅଭୟାରଣ୍ୟରେ ସରିଛି ବାଘ ଗଣନା । ଓଡ଼ିଶାର ସବୁଠାରୁ ଅଧିକ ସଂଖ୍ୟାର ବାଘ ଶିମିଳିପାଳ ଦେଖିବାକୁ ମିଳିଥାଏ । ସୂଚନା ଅନୁଯାୟୀ ଶିମିଳିପାଳ ଅଭୟାରଣ୍ୟରେ ବର୍ଷକ ମଧ୍ୟରେ ଦୁଇଥର ବାଘ ଗଣନା ହେଇଥାଏ ।
କୋର ଓ ବୋଫର ଜୋନରେ କ୍ୟାମେରା ଓ ବାଘର ପାଦଚିହ୍ନକୁ ନେଇ ଗଣନା କାର୍ଯ୍ୟ କରିଥାନ୍ତି ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପର କର୍ମଚାରୀ ମାନେ । ତେବେ ଦୁଇଟି ପଦ୍ଧତି ମାଧ୍ୟମରେ ଏହି ଗଣନା କାର୍ଯ୍ୟ କରାଯାଇଛି। ସେଗୁଡିକ ହେଲା ସାଇନ ପଦ୍ଧତି ଓ ଲାଇନ ଟ୍ରାନଜିଟ ପଦ୍ଧତି । ଏହି ବ୍ୟାଘ୍ର ଗଣନା କାର୍ଯ୍ୟକ୍ରମ ୨୮ ଜାନୁଆରୀ ରୁ ଆରମ୍ଭ ହୋଇଥିବା ବେଳେ ଫେବୃୟାରୀ 3ରେ ଶେଷ ହୋଇଛି ।
ବିଶେଷ କରି ଲାଇନ ଟ୍ରାନଜିଟ ମାଧ୍ୟମରେ ବାଘର ପାଦ ଚିହ୍ନ ଓ ବିଭିନ୍ନ ସ୍ଥାନରେ ଲାଗିଥିବା କ୍ୟାମେରା ସାହାଯ୍ୟରେ ଗଣନା କାର୍ଯ୍ୟ ହୋଇଛି । ବିଭାଗ ପକ୍ଷରୁ ବାଘ ଚଳପ୍ରଚଳ କରୁଥିବା ସ୍ଥାନରେ ପ୍ଲାଷ୍ଟର ଅଫ ପ୍ୟାରିସ ଦିଆଯାଇଥାଏ। ଯାହା ଦ୍ବାରା ବାଘର ବୟସ କେତେ ହେବ ବୋଲି ଜାଣିପାରନ୍ତି ବିଶେଷଜ୍ଞମାନେ ।
ଗଣନା କାର୍ଯ୍ୟରେ ୨୦୧ଟି ବିଟ୍ ହାଉସର ସମସ୍ତ କର୍ମଚାରୀ ମାନେ ନିୟୋଜିତ ହୋଇଥିଲେ । ଏହି ଗଣନା ଦ୍ବାରା ବାଘ ସହିତ ଅନ୍ୟ ବନ୍ୟପ୍ରାଣୀ ମାନଙ୍କର ଉପସ୍ଥିତି ମଧ୍ୟ ଗଣନା କରାଯାଇଛି । ତେବେ ବିଭାଗ ପକ୍ଷରୁ ବାଘ ଗଣନା ରିପୋର୍ଟ ଦିଆଯାଇନାହିଁ ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
