ବାରିପଦା: ଗାଁ ନିକଟସ୍ଥ ଚାଷଜମିରେ ଛେଳି ଚରାଇବାକୁ ଯାଇଥିବାବେଳେ ବଜ୍ରପାତରେ ତିନି ଜଣ ନାବାଳକଙ୍କ ମୃତ୍ୟୁ ହୋଇଛି। ମୟୂରଭଞ୍ଜ ଜିଲ୍ଲା ଚାନ୍ଦୁଆ ଥାନା ଅନ୍ତର୍ଗତ ବାଘୁଆଷୋଳ ଗାଁରେ ଏଭଳି ଏକ ଦୁଃଖଦ ଘଟଣା ଘଟିଛି । ମଙ୍ଗଳବାର ଦ୍ବିପ୍ରହରରେ ଅଚାନକ ଘଡଘଡି ସହ ପ୍ରବଳ ବର୍ଷା ହୋଇଥିଲା । ଏହି ସମୟରେ ତିନି ନାବାଳକ ପାଖରେ ଥିବା ଏକ ଗଛ ତଳେ ଆଶ୍ରୟ ନେଇଥିଲେ । ଏହି ସମୟରେ ପୁନଃ ବଜ୍ରପାତ ହେବାରୁ ତିନି ଜଣଙ୍କ ମୃତ୍ୟୁ ହୋଇଛି ।
ମୃତକ ବାଘୁଆଷୋଳ ଗ୍ରାମର ବାଵଲୁ ନାଏକ, ବର୍ଷା ନାଏକ ଓ ସୁଜିତ ନାଏକ ବୋଲି ଜଣାପଡ଼ିଛି । ଏହି ତିନି ଜଣ ପରସ୍ପର ସମ୍ପର୍କୀୟ ବୋଲି ଜଣାପଡ଼ିଛି । ବଜ୍ରପାତ ପରେ ତିନିଜଣଙ୍କୁ ଗୁରୁତର ଅବସ୍ଥାରେ ବାରିପଦା ପଣ୍ଡିତ ରଘୁନାଥ ମୁର୍ମୁ ମେଡ଼ିକାଲ କଲେଜ ଆଣ୍ଡ୍ ହସ୍ପିଟାଲରେ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା । ଚିକିତ୍ସାଧିନ ଅବସ୍ଥାରେ ତାଙ୍କର ମୃତ୍ୟୁ ହୋଇଛି । ତିନି ନାବାଳକଙ୍କ ମୃତ୍ୟୁ ପରେ ବାଘୁଆଷୋଳ ଗାଁରେ ଶୋକର ଛାୟା ଖେଳି ଯାିଇଛି ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
