ବାରିପଦା: କଲେଜ ଅଧ୍ୟକ୍ଷଙ୍କ ଦୁର୍ବ୍ୟବହାରକୁ ନେଇ ଅଶାନ୍ତ ଛାତ୍ରଛାତ୍ରୀ । ପ୍ରତିବାଦରେ କଲେଜ ଗେଟରେ ତାଲା ପକାଇବା ସହ ଟାୟାର ଜାଳି ବିକ୍ଷୋଭ ପ୍ରଦର୍ଶନ କରିଛନ୍ତି । ଏଭଳି ଘଟଣା ଦେଖିବାକୁ ମିଳିଛି ମୟୂରଭଞ୍ଜ ଜିଲ୍ଲା ଗୋପବନ୍ଧୁନଗର ବ୍ଲକ ଅଧିନରେ ଥିବା ପୁରୁଣା ବାରିପଦା ଆଞ୍ଚଳିକ ଡିଗ୍ରୀ ମହାବିଦ୍ୟାଳୟରେ ।
ସୂଚନାନୁସାରେ, ମହାବିଦ୍ୟାଳୟର ଯୁକ୍ତ 3 ଦ୍ବିତୀୟ ବର୍ଷର ଜଣେ ଛାତ୍ର ନିଜର ସିଏଲସି ନେବା ପାଇଁ କଲେଜ ଆସିଥିଲେ । କିନ୍ତୁ ସିଏଲସି ନେବା ପୂର୍ବରୁ ୫ ହଜାର ଟଙ୍କା ଦେବାକୁ କହିଥିଲେ କଲେଜ ଅଧ୍ୟକ୍ଷ । ତେବେ ଶନିବାର ଉକ୍ତ ଛାତ୍ର ସିଏଲସି ଆଣିବାକୁ 5 ହଜାର ଟଙ୍କା ନେଇ ଆସିଥିବାବେଳେ କଲେଜ ଆକାଉଣ୍ଟଟାଣ୍ଟ ତାଙ୍କୁ ସାଢେ ୭ ହଜାର ଟଙ୍କା ମାଗିଥିଲେ । ଯାହାକୁ ନେଇ ଉଭୟଙ୍କ ମଧ୍ୟରେ ଝଗଡା ହୋଇଥିଲା ।
ଉକ୍ତ ବଚସାକୁ କେନ୍ଦ୍ରକରି କଲେଜ ଅଧ୍ୟକ୍ଷ ମନୋଜ ସାହୁ ଏବଂ କଲେଜର ଆକାଉଣ୍ଟଟାଣ୍ଟ ଶଶିଭୂଷଣ ମିଶ୍ର ତାଙ୍କୁ ମାଡ଼ ମାରିଥିବା ନେଇ ଛାତ୍ର ଜଣକ ଅଭିଯୋଗ କରିଛନ୍ତି । ଯାହାକୁ ନେଇ ଛାତ୍ରଛାତ୍ରୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିଲା । ଶେଷରେ ବାଧ୍ୟ ହୋଇ ଛାତ୍ରଛାତ୍ରୀ କଲେଜ ମୁଖ୍ୟ ଫାଟକରେ ତାଲା ପକାଇବା ସହିତ କଲେଜ ସମ୍ମୁଖରେ ଟାୟାର ଜାଳି ବିକ୍ଷୋଭ ପ୍ରଦର୍ଶନ କରିଛନ୍ତି ।
ବିଭିନ୍ନ ସମୟରେ ଉକ୍ତ କଲେଜର ଅଧ୍ୟକ୍ଷ ଛାତ୍ରଛାତ୍ରୀଙ୍କ ପ୍ରତି ଏଭଳି ଦୁର୍ବ୍ୟବହାର କରୁଥିବା ନେଇ ଛାତ୍ରଛାତ୍ରୀ ଅଭିଯୋଗ କରିଛନ୍ତି । ଏଥିସହିତ ତାଙ୍କର ବଦଳି ଦାବି କରିଛନ୍ତି । ସେପଟେ ଘଟଣାସ୍ଥଳରେ ପୋଲିସ ପହଞ୍ଚି ଉତ୍ତ୍ୟକ୍ତ ଛାତ୍ରଛାତ୍ରୀଙ୍କୁ ବୁଝାସୁଝା କରିଛି ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
