ବାରିପଦା: ଶିମିଳିପାଳ ଅଭୟାରଣ୍ୟରେ ଲାଗିଥିବା ନିଆଁ ଆୟତ୍ତ ହୋଇପାରୁନାହିଁ । ତେବେ ଆଜି ମୟୂରଭଞ୍ଜ ଜିଲ୍ଲାପାଳ ଏବଂ ଏସପି ଶିମିଳିପାଳ ପାଦଦେଶ ବାଙ୍ଗରିପୋଷି ରେଞ୍ଜ ଜଲଡ଼ିହା ଜଙ୍ଗଲରେ ସ୍ଥିତି ପରଖିଛନ୍ତି ।
ଶିମିଳିପାଳ ଅଭୟାରଣ୍ୟରେ ଲାଗିଥିବା ନିଆଁ ଲିଭାଇବାକୁ ଆଜିଠୁ ନିୟୋଜିତ ହୋଇଛନ୍ତି ଓଡ୍ରାଫ୍ ଟିମ୍। ବାଲେଶ୍ବର ଓ ବାରିପଦାରୁ ଓଡ୍ରାଫ ଟିମର ଏକ ୫୦ ଜଣିଆ ଟିମ୍ ଶିମିଳିପାଳର ଯଶିପୁର ଓ ପିଠାବଟା ରେଞ୍ଜରେ ପହଞ୍ଚିଛନ୍ତି । ଏହି ଟିମ୍ ନିଆଁ ଲିଭାଇବା ପାଇଁ ବିଭିନ୍ନ ସରଞ୍ଜାମ ସହ ଶିମିଳିପାଳରେ ନିଆଁ ଲାଗିଥିବା ବିଭିନ୍ନ ସ୍ଥାନକୁ ଯାଇ ନିଆଁ ଲିଭାଇବା କାର୍ଯ୍ୟରେ ସହଯୋଗ କରିବେ । ସେହି ଭଳି ଶିମିଳିପାଳରେ ଆଜି ମଧ୍ୟ ବିଭିନ୍ନ ସ୍ଥାନରେ ନିଆଁ ଲାଗିଥିବାର ଖବର ଆସିଛି । ଶିମିଳିପାଳ ଅଭୟାରଣ୍ୟରେ ନିଆଁକୁ ନେଇ ବନବିଭାଗ ବୈଠକରେ ଶିମିଳିପାଳ କ୍ଷେତ୍ର ନିର୍ଦେଶକ ଶିମିଳିପାଳ ଉପନିର୍ଦେଶକ ବାରିପଦା ରାଇରଙ୍ଗପୁର, କରଞ୍ଜିଆ ବନଖଣ୍ଡ ୩ ଡିଏଫଓ ମୟୂରଭଞ୍ଜ ଜିଲ୍ଲାପାଳ ଏବଂ ଏସପିଙ୍କ ସହ ଆଲୋଚନା କରାଯାଇଛି। ଆଜି ନିଜେ ମୟୂରଭଞ୍ଜ ଜିଲ୍ଲାପାଳ ଓ ଏ ବନଅଧିକାରୀଙ୍କ ସହ ନିଆଁ ଲାଗିଥିବା ବିଭିନ୍ନ ସ୍ଥାନ ବୁଲି ଦେଖିଥିଲେ ଏବଂ ନିଆଁ ଲଗାଇଥିବା ଲୋକ ଓ ଗ୍ରାମବାସୀଙ୍କୁ ସଚେତନତା କରିବା ପାଇଁ ବିଭିନ୍ନ ପଦକ୍ଷେପ ନିଆଯିବା ପାଇଁ କୁହାଯାଇଛି।
ସେପଟେ ମୟୂରଭଞ୍ଜ ଜିଲ୍ଲାପାଳ ବିନୀତ ଭରଦ୍ବାଜ ଏବଂ ଏସପି ସ୍ମିଥ୍ ପୁରୁଷୋତ୍ତମ ଦାସ ବାଙ୍ଗିରିପୋଷି ରେଞ୍ଜ ର ଜଳଡିହା ଜଙ୍ଗଲରେ ନିଆଁ ଲାଗିଥିବା ସ୍ଥାନ ବୁଲି ଦେଖିଥିଲେ । ଏହି ସମୟରେ ସ୍ଥାନୀୟ ସରପଞ୍ଚ , ବିଡ଼ିଓ,ତହସିଲଦାର ଏବଂ ପୋଲିସ ସହ ମଧ୍ୟ ଆଲୋଚନା କରି ଲୋକଙ୍କ ମଧ୍ୟରେ ସଚେତନତା କାର୍ଯ୍ୟକ୍ରମ କରିବା ପାଇଁ ନିର୍ଦ୍ଦେଶ ଦେଇଥିଲେ ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
