ମୟୂରଭଞ୍ଜ: ବହଳଦା ବ୍ଲକ ଅନ୍ତର୍ଗତ ଗୁଣ୍ଡୁରିଆଠାରେ ଆଦିମ ଜନଜାତି ଆଦିବାସୀ ସମ୍ପ୍ରଦାୟ ପକ୍ଷରୁ ପାଳିତ ହୋଇ ଆସୁଛି ଶହୀଦ ଦିବସ । ଶହୀଦ ଆଦିବାସୀମାନଙ୍କୁ ସ୍ମରଣ କରିବା ପାଇଁ ପ୍ରତ୍ୟେକ ବର୍ଷ ପରି ଏ ବର୍ଷ ମଧ୍ୟ ଆଦିବାସୀ ସମ୍ପ୍ରଦାୟ ତରଫରୁ ଶହୀଦ ଦିବସ ପାଳନ କରାଯାଇଛି । ଏହି ଅବସରରେ ପଡୋଶୀ ଝାଡ଼ଖଣ୍ଡ ରାଜ୍ୟରୁ ମଧ୍ୟ ବହୁ ସଂଖ୍ୟାରେ ଆଦିବାସୀ ସମ୍ପ୍ରଦାୟର ଲୋକମାନେ ଯୋଗ ଦେଇଥାନ୍ତି ।
ଜୟ ଜୀନ୍ଦ, ଜୟ ଜୀନ୍ଦ ନାରାରେ କମ୍ପୁଛି ଗଗନ ପବନ । ବାଜୁଛି ବୀର ବାଜା । ଆଉ ହାତରେ ଧନୁତୀର ଧରି ବିଶାଳ ଶୋଭାଯାତ୍ରାରେ ବାହାରିଛନ୍ତି ଗୁଣ୍ଡୁରିଆର ଆଦିବାସୀ । ୭୧ ବର୍ଷ ତଳେ ନିଜ ହକ୍ ପାଇଁ ଲଢି ଶହୀଦ ହୋଇଥିବା ବୀରପୁତ୍ରଙ୍କ ସ୍ମୃତିଚାରଣ କରି ପାଳୁଛନ୍ତି ଶହୀଦ ଦିବସ । ଓଡ଼ିଶାରେ ମୟୂରଭଞ୍ଜର ମିଶ୍ରଣକୁ ବିରୋଧ କରି ସ୍ବତନ୍ତ୍ର "ଦିଶୋମ ରାଜ୍ୟ" ଘୋଷଣା ନେଇ ତତ୍କାଳୀନ ମୂଖ୍ୟମନ୍ତ୍ରୀ ଡ ହରେକୃଷ୍ଣ ମହତାବଙ୍କ ନିକଟରେ ଦାବି କରିଥିଲେ ଆଦିବାସୀ । ଏନେଇ ପରବର୍ତ୍ତି ସମୟରେ ଆନ୍ଦୋଳନ ତୀବ୍ରତର ହେବାସହ ଗୁଣ୍ଡୁରିଆ ଠାରେ ଏକ ବିଶାଳ ଶୋଭାର ଆୟୋଜନ କରାଯାଇଥିଲା । ତେବେ କୌଣସି କାରଣ ବଶତଃ ତତ୍କାଳୀନ ପ୍ରଶାସନ ତରଫରୁ ନିରୀହ ଆଦିବାସୀଙ୍କ ଉପରେ ଗୁଳି ବର୍ଷଣ ହୋଇଥିଲା । ପୋଲିସ ଗୁଳିରେ ଆଖି ବୁଜିଥିଲେ ଶତାଧିକ ନିରୀହ ଆଦିବାସୀ ।
୭୧ ବର୍ଷ ତଳେ ହୋଇଥିବା ଗୁଳିକାଣ୍ଡର ତଦନ୍ତ ମଧ୍ୟ ହୋଇ ନଥିବା ଏବଂ ଗୁଳିକାଣ୍ଡରେ ଶହୀଦ ହୋଇଥିବା ଆଦିବାସୀଙ୍କୁ ଚିହ୍ନଟ କରାଯାଇ ନଥିବାରୁ ଅଭିଯୋଗ କରିଛନ୍ତି ଗ୍ରାମବାସୀ । ତେବେ ପ୍ରତିବର୍ଷ ଆଦିବାସୀ ପ୍ରୀତି ଦେଖାଇ ବିଭିନ୍ନ ଦଳୀୟ ନେତା ମାନେ ଶହୀଦ ଦିବସରେ ଉପସ୍ଥିତି ଜାହିର କରୁଛନ୍ତି । କିନ୍ତୁ କେତେ ଜଣ ଶହୀଦ ହୋଇଥିଲେ ଏବଂ ଯେଉଁ ମାନେ ଶହୀଦ ହୋଇଥିଲେ ସେମାନଙ୍କୁ ଚିହ୍ନଟ କରିବା ସହ ବିଧିବଦ୍ଧ ଭାବେ, ସେହି ଦିନକୁ ଶହୀଦ ଦିବସ ଭାବେ ପାଳିବାକୁ ଆନ୍ତରିକତା ପ୍ରକାଶ କରୁନାହାଁନ୍ତି । ତା ସହିତ ଶହୀଦ ପୀଠର ଉନ୍ନତିକରଣ ପାଇଁ କାହାରି ଦୃଷ୍ଟି ପଡିପାରୁ ନାହିଁ । ଯାହାପାଇଁ ଶହୀଦ ପରିବାର ବି ପ୍ରଶ୍ନ କରିଛନ୍ତି ଉଭୟ ରାଜ୍ୟ ଓ କେନ୍ଦ୍ର ସରକାରଙ୍କୁ । ଏପଟେ ଏନେଇ ବିଧାନସଭାରେ ସ୍ବର ଉଠାଇବେ ବୋଲି ରାଇରଙ୍ଗପୁର ବିଧାୟକ ପ୍ରତିକ୍ରିୟାରେ କହିଛନ୍ତି।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
