ବାରିପଦା: ଦୁଷ୍କର୍ମକାରୀଙ୍କୁ ସଶ୍ରମ କାରାଦାଣ୍ଡଦେଶ ଶୁଣାଇଲେ ବାରିପଦା ସ୍ପେଶାଲ କୋର୍ଟ । ବୁଧବାର ଅଦାଲତ ଏହି ରାୟ ଶୁଣାଇଛନ୍ତି । ଜଗନ୍ନାଥ ପୂର୍ତ୍ତୀ ନାମକ ଜଣେ ଦୁଷ୍କର୍ମ ଅଭିଯୁକ୍ତକୁ ୭ ବର୍ଷ ସଶ୍ରମ କାରାଦଣ୍ଡ ସହ ୫ ଲକ୍ଷ ଟଙ୍କା ଅର୍ଥଦଣ୍ଡରେ ଦଣ୍ଡିତ କରିଛନ୍ତି ସ୍ପେଶାଲ ଅତିରିକ୍ତ ସେସନ ଜଜ୍ ଦୁର୍ଗାଚରଣ ମିଶ୍ର ।
ସୂଚନା ଅନୁଯାୟୀ, ତିନି ବର୍ଷ ପୂର୍ବେ ଏହି ଦୁଷ୍କର୍ମ ଘଟଣା ସାମ୍ନାକୁ ଆସିଥିଲା । ମୟୂରଭଞ୍ଜ ଜିଲ୍ଲାର ବାଙ୍ଗିରିପୋଷୀ ଥାନା ଅନ୍ତର୍ଗତ ଅଞ୍ଚଳର ଜଗନ୍ନାଥ ପୁର୍ତ୍ତୀ ଜଣେ ମହିଳାଙ୍କ ଘରେ ପଶି ତାଙ୍କୁ ଦୁଷ୍କର୍ମ କରିଥିଲେ । ୨୦୧୯ ମସିହାରେ ବାଙ୍ଗିରିପୋଷି ପୋଲିସ ଅଭିଯୁକ୍ତକୁ ଗିରଫ କରି ଆଇପିସି ଧାରା ୩୭୬ ଓ ୪୫୦ ଅଧିନରେ କୋର୍ଟ ଚାଲାଣ କରିଥିଲା ।
ବୁଧବାର ସ୍ପେଶାଲ ଅତିରିକ୍ତ ସେସନ ଜଜ୍ ଏହି ମାମଲାର ଶୁଶାଣି କରିଛନ୍ତି । ବିଭିନ୍ନ ସାକ୍ଷୀ ପ୍ରମାଣକୁ ଭିତ୍ତିକରି ଅଭିଯୁକ୍ତ ଜଗନ୍ନାଥ ପୁର୍ତ୍ତୀକୁ ୭ ବର୍ଷ ସଶ୍ରମ ଜେଲଦଣ୍ଡ ଓ ଅନ୍ୟ ଏକ ଦଫାରେ ୬ ମାସ କାରାଦଣ୍ଡରେ ଦଣ୍ଡିତ କରିଛନ୍ତି । ଏହା ସଙ୍ଗେ ସଙ୍ଗେ ପୀଡିତାଙ୍କୁ ୫ ଲକ୍ଷ ଟଙ୍କା କ୍ଷତିପୂରଣ ପ୍ରଦାନ କରିବା ପାଇଁ ରାୟ ପ୍ରକାଶ କରିଛନ୍ତି ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
