ବାରିପଦା: ରାଜ୍ୟସଭାର ଶୀତକାଳୀନ ଅଧୀବେଶନରେ ଶିମିଳିପାଳ ବ୍ୟାଘ୍ର ସଂରକ୍ଷଣରେ ରୋପ-ୱେ ନିର୍ମାଣ ଏବଂ ପର୍ଯ୍ୟଟନ ବିକାଶ ପାଇଁ ଗୁରୁବାର ପୁଣି ଦାବି କରିଛନ୍ତି ବିଜୁ ଜନତା ଦଳର ରାଜ୍ୟସଭା ସାଂସଦ ସରୋଜିନୀ ହେମ୍ବ୍ରମ ।
ରାଜ୍ୟସଭାରେ ଅଧ୍ୟକ୍ଷଙ୍କୁ ହେମ୍ରମ କହିଛନ୍ତି ଯେ, ଓଡିଶାର ଶିମିଳିପାଳ ଅଭୟାରଣ୍ୟ ଆଦିବାସୀ ବହୁଳ ମୟୂରଭଞ୍ଜ ଜିଲ୍ଲାରେ ଅଛି ହେଲେ ଏଠାରେ ଜୈବ୍ୟ ପରିବେଶ ସଂରକ୍ଷଣ ଯୋଗୁଁ ଜିଲ୍ଲାରେ ଏପର୍ଯ୍ୟନ୍ତ ଶିଳ୍ପର ବିକାଶ ହୋଇପାରିନାହିଁ । ଏହା ବଦଳରେ ସେଠାରେ ପର୍ଯ୍ୟଟନର ବିକାଶ ନିତାନ୍ତ ଜରୁରୀ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ଅଭୟାରଣ୍ୟର ବିକାଶ ପାଇଁ ଅନେକ ପଦକ୍ଷେପ ଗ୍ରହଣ କରିଛନ୍ତି । ସବୁ ଋତୁକୁ ସୁହାଇଲା ଭଳି ରାସ୍ତା ନିର୍ମାଣ କରିବା ଅସମ୍ଭବ ହେତୁ ରୋପ-ୱେ କୁ ଗୁରୁତ୍ୱ ଦେବା ଆବଶ୍ୟକ ବୋଲି କହିଥିଲେ।
ଏହି ଅଭୟାରଣ୍ୟରେ ଅନେକ ଔଷଧୀୟ ବୃକ୍ଷ ସାଙ୍ଗକୁ ଟସର ଉତ୍ପାଦନ ମଧ୍ୟ ହେଉଛି । ତେଣୁ ଏହାର ଗମନାଗମନର ସଠିକ ଉନ୍ନତିକରଣ କରାଗଲେ ଅନେକ ନିଯୁକ୍ତି ସୃଷ୍ଟି ହୋଇପାରିବା ସହ ରାଜସ୍ବ ବୃଦ୍ଧି ହୋଇପାରିବ ବୋଲିରାଜ୍ୟସଭାରେ ଦାବି କରିଛନ୍ତି ସରୋଜିନୀ।
ସେହିପରି ମୟୂରଭଞ୍ଜ ଜିଲ୍ଲା ବେତନଟୀ ରେଲୱେ ଷ୍ଟେସନରୁ ଜବରଦଖଲ ଦୋକାନୀଙ୍କୁ ଉଚ୍ଛେଦ କରିବା ଉପରେ ମଧ୍ୟ୍ୟ ସେ ଗୁରୁତ୍ୱାରୋପ କରିଥିଲେ। ରାଜ୍ୟସଭା ସାଂସଦ ହେମ୍ରମ ରାଜ୍ୟ ତଥା ମୟୂରଭଞ୍ଜ ଜିଲ୍ଲାର ବିଭିନ୍ନ ପ୍ରସଙ୍ଗ ଉଠାଇ ସବୁବେଳେ ଚର୍ଚ୍ଚାରେ ରହି ଆସୁଥିଲେ। ରାଜ୍ୟସଭାରେ ତାଙ୍କର ଆଉ ମାତ୍ର ଦୁଇ ମାସ କାର୍ଯ୍ୟକାଳ ବାକି ଥିବାବେଳେ ପୁଣି ଥରେ ଶିମିଳିପାଳ ଅଭୟାରଣ୍ୟ ପ୍ରସଙ୍ଗ ଉଠାଇ ଜିଲ୍ଲାବାସୀଙ୍କ ମନ କିଣିଛନ୍ତି।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
