ରାଇରଙ୍ଗପୁର: ଭତ୍ତା ବାଣ୍ଟି ଫେରୁଥିବା ବେଳେ ଟଙ୍କା ଲୁଟିନେଲେ ଦୁବୃର୍ତ୍ତ। ଏହି ଘଟଣାକୁ ନେଇ ସନ୍ଦେହ ଘେରକୁ ଆସିଛନ୍ତି ପିଇଓ। ଏଠାରେ ପ୍ରଶ୍ନ ଉଠେ ଯେ ଶ୍ରୀ ମୁର୍ମୁ ଏତେ ଟଙ୍କା କାହାକୁ କହି ଓ କେଉଁ ପରିସ୍ଥିତିରେ ନେଇ ଏକୁଟିଆ ଯାଉଥିଲେ। ଏହା ପୂର୍ବ ଯୋଜନା ଅନୁଯାୟୀ ହୋଇ ନାହିଁ ତ, ଏପରି ବହୁ ପ୍ରଶ୍ନ ଏବେ ସାଧାରଣରେ ଉଙ୍କି ମାରିବା ସହ ଚର୍ଚ୍ଚାର ବିଷୟ ପାଲଟିଛି।
ମୟୂରଭଞ୍ଜ ଜିଲ୍ଲା ରରୁଆଁ ଥାନା ଅନ୍ତର୍ଗତ ଦରୀ ଗ୍ରାମପଞ୍ଚାୟତ ପୋଖରିଆ ଗ୍ରାମପଞ୍ଚାୟତର ପିଇଓ ଦୁର୍ଗା ଚରଣ ମୁର୍ମୁ । ସେ ମଙ୍ଗଳବାର ଭତ୍ତା ଟଙ୍କା ବାଣ୍ଟି ସନ୍ଧ୍ୟା ସମୟରେ ଏକ ବାଇକ ଯୋଗେ ବ୍ଳକକୁ ଫେରୁଥିଲେ।
ହେଲେ ବ୍ଲକରେ ପହଞ୍ଚିବା ପୂର୍ବରୁ ୪୯ ନମ୍ବର ଜାତୀୟ ରାଜପଥ ପୋଖରିଆ ଠାରେ 2 ଜଣ ଦୁବୃର୍ତ୍ତ ମଟର ସାଇକେଲରେ ଆସି ପଛପଟୁ ଗାଡିକୁ ଧକ୍କା ମାରିବାରୁ ସେ ସେଠାରେ ପଡିଯାଇଥିଲେ। ଏହାର ସୁଯୋଗ ନେଇ ୩ ଲକ୍ଷରୁ ଉର୍ଦ୍ଧ୍ବ ଟଙ୍କା ନେଇ ଦୁବୃର୍ତ୍ତ ଚମ୍ଫଟ ମାରିଥିବା ରରୁଆଁ ଥାନାରେ ଅଭିଯୋଗ ହୋଇଛି।
ସୂଚନା ଅନୁସାରେ, ଦରି ଗ୍ରାମପଞ୍ଚାୟତରେ ୯୦୦ ପାଖାପାଖି ହିତାଧିକାରୀ ଅଛନ୍ତି। ପାଖାପାଖି ୪ ଲକ୍ଷ ୭୭ହଜାର ୨୦୦ ଟଙ୍କା ବ୍ୟାଙ୍କରୁ ନେଇ ଗ୍ରାମ ପଞ୍ଚାୟତରେ ପହଞ୍ଚିଥିଲେ ମୁର୍ମୁ। ତେବେ PEO ଦିନ ସାରା କେତେ ଲୋକଙ୍କୁ ଭତ୍ତା ବଣ୍ଟନ କରିଛନ୍ତି ଏବଂ ଏତେ ଟଙ୍କା ବଣ୍ଟା ନହୋଇ ବଳିଲା କିପରି ତାହା ପ୍ରଶ୍ନବାଚୀ ସୃଷ୍ଟି କରିଛି ?
ସେହିପରି ତାଙ୍କ ସୂଚନା ଅନୁଯାୟୀ ତାଙ୍କୁ ଯଦି ଦୁର୍ବୃତ୍ତ ଧକ୍କା ଦେଇ ତଳେ ପକାଇ ଦେଇଥିଲେ ତେବେ ଚଳନ୍ତା ମୋଟର ସାଇକେଲରୁ ପଡି ମୁର୍ମୁଙ୍କ କୌଣସି କ୍ଷତି ହୋଇନଥିବା ବେଳେ ତାଙ୍କ ମୋଟର ସାଇକେଲର ମଧ୍ୟ କୌଣସି କ୍ଷତି ହୋଇନି । ଏପରି ବହୁ ପ୍ରଶ୍ନକୁ ନେଇ ରରୁଆଁ ଥାନା ପୋଲିସ ଦ୍ଵନ୍ଦରେ ଥିବାବେଳେ ତଦନ୍ତ କରିବାକୁ କୌଣସି ଦିଗ ପାଉନି ।
ତେବେ ରରୁଆଁ ଥାନା ପୋଲିସ ପକ୍ଷରୁ ତଦନ୍ତ ଆରମ୍ଭ କରାଯାଇ ଦରି ପିଇଓ ଏବଂ ଜିଆରଏସଙ୍କୁ ପଚରା ଉଚାରା କରୁଥିବା ବେଳେ ଚୋରି ଘଟଣାର କୌଣସି ସୁରାକ ବର୍ତ୍ତମାନ ସୁଦ୍ଧା ମିଳିପାରିନାହିଁ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
