ରାଇରଙ୍ଗପୁର: ଜଙ୍ଗଲରେ ନିଆଁ ଲଗାଇ ଜଣେ ଗିରଫ । ମୟୂରଭଞ୍ଜ ଜିଲ୍ଲା ଶିମିଳିପାଳ ଅଭୟାରଣ୍ୟର ପାଦ ଦେଶରେ ଥିବା ପକାମୁଣ୍ଡା ସଂରକ୍ଷିତ ଜଙ୍ଗଲରେ ନିଆଁ ଲଗାଇବା ଅଭିଯୋଗରେ ଜଣକୁ ଗିରଫ କରିଛି ବନବିଭାଗ । ତେବେ ଗିରଫ ହୋଇଥିବା ବୃଦ୍ଧ ଜଣକ ହେଲେ ରଘୁନାଥ ସିଂ ।
ସୂଚନା ଅନୁସାରେ, ମଙ୍ଗଳବାର ସନ୍ଧ୍ୟା ସମୟରେ ଦୁଧିଆଣି ରେଞ୍ଜର ବନ କର୍ମଚାରୀ ମାନେ ପାଟ୍ରୋଲିଂ କରୁଥିଲେ । ଏହି ସମୟରେ ଜଣେ ବୃଦ୍ଧ ପକାମୁଣ୍ଡା ସଂରକ୍ଷିତ ଜଙ୍ଗଲରେ ନିଆଁ ଲଗାଉଥିବା ଦେଖି ତାଙ୍କୁ ସେଠାରୁ ଗିରଫ କରିଥିଲେ । ଚଳିତ ବର୍ଷ ଶିମିଳିପାଳ ଅଭୟାରଣ୍ୟ ଏବଂ ଶିମିଳିପାଳ ପାଦ ଦେଶରେ ଥିବା ଗାଁ ଗୁଡିକରେ ବନବିଭାଗ ବ୍ୟାପକ ସଚେତନତା କରିଥିଲେ ବି ମନୁଷ୍ୟକୃତ ନିଆଁ ରୋକିବାରେ ସଫଳତା ପାଇ ପାରିନି ବନବିଭାଗ ।
ଯାହା ଫଳରେ ବିଭିନ୍ନ ସମୟରେ ଲୋକେ ବନ୍ୟଜନ୍ତୁ ଶିକାର ହେଉ କିମ୍ବା ଜଙ୍ଗଲ ନିଆଁ ଲଗାଇ ଜେଲ ହାଜତକୁ ଯାଉଥିବା ଦେଖିବାକୁ ମିଳୁଛି । ମଙ୍ଗଳବାର ଶିମିଳିପାଳ ଅଭୟାରଣ୍ୟର ତାଳବନ୍ଧ ରେଞ୍ଜ ଅଞ୍ଚଳର ବାଙ୍କୀଡିହି ଜଙ୍ଗଲରେ ନିଆଁ ଲଗାଇ ଦୁଇ ଜଣ ଗିରଫ ହୋଇଥିବା ବେଳେ ପକାମୁଣ୍ଡା ଜଙ୍ଗଲରେ ନିଆଁ ଲଗାଇ ଜଣେ ଗିରଫ ହୋଇଛନ୍ତି । ତେବେ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯିବ ବୋଲି ବନବିଭାଗ ବନବିଭାଗ ପକ୍ଷରୁ ସୂଚନା ମିଳିଛି ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
