ରାଇରଙ୍ଗପୁର: ଗତକାଲି ରାତିରେ ପାଟୁଳିଡ଼ିହି ଅଞ୍ଚଳରେ ଜଣେ ବୃଦ୍ଧାଙ୍କୁ କେହି ଅଜଣା ଦୁର୍ବୃତ୍ତ ହତ୍ୟା କରିଛି । ହତ୍ୟାପରେ ଶରୀରରୁ ମୁଣ୍ଡକୁ ଅଲଗା କରି ନଦୀକୂଳରେ ପିଙ୍ଗି ଦେଇଥିବା ଦେଖିବାକୁ ମିଳିଛି । ହତ୍ୟାର ଶିକାର ହୋଇଥିବା ମହିଳା ଜଣକ ବନ୍ଧସାହି ଗ୍ରାମର ଜିରାମଣି ସୋଏ ବୋଲି ଜଣାପଡିଛି । ତାଙ୍କୁ ଡାହାଣୀ ସନ୍ଦେହରେ ହତ୍ୟା କରାଯାଇଥିବା ଗ୍ରାମବାସୀ ସନ୍ଦେହ କରିଛନ୍ତି । ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଓ କଟାମୁଣ୍ଡ ଉଦ୍ଧାର କରିବା ସହ ତଦନ୍ତ ଜାରି ରଖିଛି ।
ଗତକାଲି ବିଳମ୍ବିତ ରାତିରେ କେହି ଦୁର୍ବୃତ୍ତ ବିଧବା ଜିରାମଣି ସୋଏଙ୍କୁ ହତ୍ୟା କରିଥିଲା । ଏହାପରେ ତାଙ୍କ ମୁଣ୍ଡରୁ ଗଣ୍ଡିକୁ ଅଲଗା କରିବା ସହ ୪୦୦ମିଟର ଦୂରରେ ଥିବା ନଦୀତୁଠରେ ପକାଇ ଦେଇଥିଲେ । ତେବେ ଆଜି ସକାଳୁ ଗ୍ରାମର କିଛି ମହିଳା ନଦୀକୁ ଗାଧୋଇବାକୁ ଯିବାବେଳେ ଶରୀର ବିହୀନ ମୁଣ୍ଡ ତୁଠ ନିକଟରେ ପଡିଥିବା ଦେଖିଥିଲେ । ଏହାପରେ ଗ୍ରାମବାସୀଙ୍କ ଦ୍ବାରା ମୁଣ୍ଡଟି ଜିରାମଣି ସୋଏଙ୍କର ବୋଲି ଚିହ୍ନଟ କରାଯାଇଥିଲା ।
କରଞ୍ଜିଆ ଥାନାକୁ ଖବର ଦେବା ପରେ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରି ତାଙ୍କ ଘର ଠାରୁ ୨୦୦ମିଟର ଦୂରରେ ଥିବା ଏକ ବିଲରେ ମୁଣ୍ଡ ବିହୀନ ଶରୀର ପଡିଥିବା ଦେଖିବାକୁ ପାଇଥିଲା । ଅଧିକ ତଦନ୍ତ ପାଇଁ ପୋଲିସ ସାଇଣ୍ଟିଫିକ ଟିମକୁ ଖବର ଦେଇଥିବା ଜଣାପଡ଼ିଛି ।
ଜଣେ ଗ୍ରାମବାସୀଙ୍କ କହିବା ଅନୁଯାୟୀ ତାଙ୍କ ସ୍ବାମୀଙ୍କର କିଛି ଦିନ ପୂର୍ବରୁ ମୃତ୍ୟୁ ହୋଇଥିଲା । ତାଙ୍କ ଜମିଜମା ହଡପ ପାଇଁ କିମ୍ବା ଡାହାଣୀ ସନ୍ଦେହରେ ତାଙ୍କୁ ହତ୍ୟା କରିଥିବା ଗ୍ରାମବାସୀ ସନ୍ଦେହ କରିଛନ୍ତି । ତେବେ ଏପରି ହତ୍ୟାକାଣ୍ଡରେ ସାମିଲ ଥିବା ବ୍ୟକ୍ତିଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ଗ୍ରାମବାସୀ ଦାବି କରିଛନ୍ତି ।
ରାଇରଙ୍ଗପୁରରୁ ସଞ୍ଜୟ କୁମାର ପରିଡା, ଇଟିଭି ଭାରତ
