ରାଇରଙ୍ଗପୁର: ସାମାନ୍ୟ ବଚସାକୁ କେନ୍ଦ୍ର କରି ନିର୍ମମ ହତ୍ୟାକାଣ୍ଡ । ପଡୋଶୀର କଟୁରୀ ଚୋଟରେ ଯାଇଛି ପଡୋଶୀର ଜୀବନ । ଏଭଳି ଅଭାବନୀୟ ଘଟଣା ଘଟିଛି ମୟୂରଭଞ୍ଜ ଜିଲ୍ଲା କରଞ୍ଜିଆ ଥାନା ଅଧିନସ୍ଥ ଶିଆଳନଇଁ ଗ୍ରାମର ବିସ୍ଥାପିତ ବସ୍ତିରେ ।
କୌଣସି କାରଣକୁ ନେଇ ଉକ୍ତ ଗ୍ରାମର ଶଙ୍କର ଦେହୁରୀ ଓ ଚିରୁ ଦେହୁରୀଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା । ଏଥିରେ ଉତକ୍ଷିପ୍ତ ହୋଇ ଚିରୁ ଦେହୁରୀ ଏକ କଟୁରୀ ସାହାଯ୍ୟରେ ଶଙ୍କର ଦେହୁରୀଙ୍କୁ ଆକ୍ରମଣ କରିଥିଲେ । ତେବେ ଶଙ୍କର ମଧ୍ୟ ଚିରୁକୁ ପାଲଟା ଆକ୍ରମଣ କରିଥିଲେ । କିନ୍ତୁ ମୁଣ୍ଡରେ ଗଭୀର ଆଘାତ ଯୋଗୁଁ ଘଟଣାସ୍ଥଳରେ ଟଳି ପଡିଥିଲେ ଶଙ୍କର । ଏଥିସହ ଚିରୁ ମଧ୍ୟ ଗୁରୁତର ଆହତ ହୋଇଥିଲା ।
ଖବର ପାଇ କରଞ୍ଜିଆ ପୋଲିସ ଘଟଣାସ୍ଥଳରେ ପହଞ୍ଚି ଗୁରୁତର ଆହତ ହୋଇଥିବା ଚିରୁକୁ କରଞ୍ଜିଆ ଡ଼ାକ୍ତରଖାନାକୁ ଚିକିତ୍ସା ପାଇଁ ପଠାଇବା ସହ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ଏଥିସହ ହତ୍ୟାରେ ବ୍ୟବହୃତ ହୋଇଥିବା କଟୁରୀ ଜବତ କରିବା ସହ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି ପୋଲିସ ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
