ରାଇରଙ୍ଗପୁର: ନବ ବିବାହିତା ମହିଳାଙ୍କ ସନ୍ଦେହ ଜନକ ମୃତ୍ୟୁ ହୋଇଛି । ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି । ତେବେ, କେଉଁ କାରଣରୁ ମହିଳାଙ୍କ ମୃତ୍ୟୁ ହୋଇଛି ସେନେଇ ଛାନଭିନ ଆରମ୍ଭ ହୋଇଛି । ମୃତକ ଜଣକ ହେଉଛନ୍ତି ମୀନୁ ମାରାଣ୍ତି । ମହିଳାଙ୍କ ସ୍ବାମୀଙ୍କୁ ତିରିଂ ଥାନା ପୋଲିସ ଅଟକ ରଖି ଅଧିକ ତଦନ୍ତ ଜାରି ରଖିଛି ।
ସୂଚନା ଅନୁସାରେ, ମୟୂରଭଞ୍ଜ ଲୁପୁଙ୍ଗ ଗାଁର ଜନୈକ ମହିଳାଙ୍କ ମୃତଦେହ ଏକ ପୋଖରୀ ନିକଟରେ ପଡିଥିବା ଖବର ପାଇଥିଲା ପୋଲିସ । ଘଟଣାସ୍ଥଳରେ ପୋଲିସ ପହଞ୍ଚି ମୃତଦେହ ଉଦ୍ଧାର କରି ମେଡିକାଲକୁ ପଠାଇଥିଲା । ହେଲେ, ମୃତ ଶରୀରରେ ଅନେକ ସ୍ଥାନରେ କ୍ଷତ ଚିହ୍ନ ଥିବା ରହିଛି । ଏହା ଏକ ହତ୍ୟାକାଣ୍ତ ବୋଲି ପୋଲିସ ସନ୍ଦେହ କରୁଛି । ତେବେ, ମହିଳା ଜଣକ ଭୋଳାଗାଡିଆ ଗାଁର ବାସିନ୍ଦା ବୋଲି ଜଣାପଡିଛି । ସେ ନିକଟସ୍ଥ ଲୁପୁଙ୍ଗର ଦାସମାତ ଟୁଡୁଙ୍କ ସହିତ ନିକଟରେ ପ୍ରେମ ବିବାହ କରିଥିଲେ । ସେପଟେ ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ଘଟଣାର ସତ୍ୟାସତ୍ୟ ଜଣା ପଡିବ ବୋଲି ପୋଲିସ କହିଛି ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
