ରାଇରଙ୍ଗପୁର: ସଡକ ଦୁର୍ଘଟଣାରେ ଚାଲିଗଲା ମା' ପୁଅଙ୍କ ଜୀବନ । ଏଭଳି ଅଭାବନୀୟ ଘଟଣା ଘଟିଛି ମୟୂରଭଞ୍ଜ ଜିଲ୍ଲା ଯଶୀପୁର ଥାନା ଅଧିନ ଚାଇଁନେବଦା ଛକ ନିକଟରେ । ମୃତ ହେଲେ ବଡବିଲ ଗ୍ରାମର କାଲା ନାଏକଙ୍କ ସ୍ତ୍ରୀ ସାବିତ୍ରୀ ନାଏକ ଓ ତାଙ୍କ 7 ବର୍ଷର ପୁଅ ଶଙ୍କର ନାଏକ ।
ବୁଧବାର ରାତିରେ 49 ନମ୍ବର ଜାତୀୟ ରାଜପଥ ଚାଇଁନେବଦା ଗ୍ରାମ ଛକ ନିକଟରେ ଉଭୟ ମା' ଓ ପୁଅ ରାସ୍ତା ପାର ହେଉଥିବାବେଳେ ଏକ ଅଜଣା ଗାଡି ତାଙ୍କ ଉପରେ ଚଢ଼ି ଯାଇଥିଲା । ଫଳରେ ଗାଡି ଚକା ତଳେ ଚାପି ହୋଇ ଉଭୟଙ୍କ ମୃତ୍ୟୁ ହୋଇଥିଲା । ସେପଟେ ଘଟଣାକୁ ନେଇ ସ୍ଥାନୀୟ ଗ୍ରାମର ଶହ ଶହ ଲୋକ ଏକଜୁଟ ହୋଇ ରାସ୍ତା ଅବରୋଧ କରିଥିଲେ । ଖବର ପାଇ ଯଶୀପୁର ଥାନା ଅଧିକାରୀ ଘଟଣାସ୍ଥଳରେ ପହଞ୍ଚି ଉତ୍ତେଜିତ ଲୋକଙ୍କୁ ବୁଝାସୁଝା କରି ବିଫଳ ହୋଇଥିଲେ । ପରେ କରଞ୍ଜିଆ ଉପଖଣ୍ଡର ପୋଲିସ ଅଧିକାରୀ ଏବଂ ସ୍ଥାନୀୟ ତହସିଲଦାର ପହଞ୍ଚି ବୁଝାସୁଝା କରିବା ସହ ରେଡକ୍ରସ ପାଣ୍ଠିରୁ ମୃତକଙ୍କ ପରିବାରଙ୍କୁ 25 ହଜାର ଟଙ୍କା ଯୋଗାଇ ଦେଇଥିଲେ । ଏହା ପରେ ରାସ୍ତା ଅବରୋଧ ହଟିଥିଲା ।
ଯଶୀପୁର ପୋଲିସ ଉଭୟ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ କରଞ୍ଜିଆ ଉପଖଣ୍ଡ ଚିକିତ୍ସାଳୟକୁ ପଠାଇଥିବାବେଳେ ଗୁରୁବାର ସେମାନଙ୍କ ମୃତଦେହ ବ୍ୟବଚ୍ଛେଦ ହେବ ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
