ବାରିପଦା: ସ୍ବତନ୍ତ୍ର ଟ୍ରେନରେ ମୟୂରଭଞ୍ଜ ଆସୁଛନ୍ତି ପ୍ରବାସୀ ଓଡିଆ । ଏନେଇ ବାରିପଦା ଓ ଭଞ୍ଜପୁର ରେଳଷ୍ଟେସନର ସ୍ଥିତି ସମୀକ୍ଷା କରିଛନ୍ତି ମୟୂରଭଞ୍ଜ ଜିଲ୍ଲାପାଳ ଓ ଏସପି ।
ଲକଡାଉନ ଯୋଗୁଁ ଅନ୍ୟ ରାଜ୍ୟରେ ଫସି ରହିଥିବା ପ୍ରବାସୀମାନେ ସ୍ବତନ୍ତ୍ର ଟ୍ରେନ୍ ଯୋଗେ ମୟୂରଭଞ୍ଜ ଫେରୁଛନ୍ତି । ଆସନ୍ତା ମଙ୍ଗଳବାର ଏହି ଟ୍ରେନ୍ ବାରିପଦାରେ ପହଞ୍ଚିବାକୁ ଥିବାରୁ କୋରୋନା ଭୂତାଣୁ ସଂକ୍ରମଣର ଭୟ ରହିଛି । ଏହାକୁ ଦୃଷ୍ଟିରେ ରଖି ଜିଲ୍ଲା ପ୍ରଶାସନ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଛି । ଖୋଦ ମୟୂରଭଞ୍ଜ ଜିଲ୍ଲାପାଳ ବିନୀତ ଭରଦ୍ବାଜ, ଜିଲ୍ଲା ଆରକ୍ଷୀ ଅଧୀକ୍ଷକ ପରମାର ସ୍ମିଥ ପୁରୁଷୋତ୍ତମ ଦାସ ମିଳିତ ଭାବେ ପ୍ରଥମେ ସ୍ଥାନୀୟ ଭଞ୍ଜପୁର ରେଳଷ୍ଟେସନ ଏବଂ ପରେ ବାରିପଦା ରେଳଷ୍ଟେସନରେ ପହଞ୍ଚି ସ୍ଥିତି ପରଖିଛନ୍ତି । ରେଳଷ୍ଟେସନର ସ୍ଥିତି ସମୀକ୍ଷା ସମୟରେ ଜିଲ୍ଲାପାଳ ବିଭିନ୍ନ ବିଭାଗର ବିଭାଗୀୟ ଅଧିକାରୀଙ୍କ ସହ ଆଲୋଚନା କରିଥିଲେ ।
ପ୍ରବାସୀମାନେ ଫେରୁଥିବାରୁ ରେଳଷ୍ଟେସନରେ କୌଣସି ଅପ୍ରୀତିକର ପରିସ୍ଥିତିକୁ ଏଡାଇବା ପାଇଁ ରେଳ ବିଭାଗ ଓ ସୁରକ୍ଷା କର୍ମୀମାନଙ୍କୁ ତତ୍ପର ରହିବାକୁ ଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି । ପ୍ରବାସୀମାନେ ଭୁବନେଶ୍ବର ରେଳଷ୍ଟେସନରୁ ମୟୂରଭଞ୍ଜ ଫେରୁଥିବାରୁ ବାରିପଦା ଷ୍ଟେସନରେ କୋରୋନା ସଂକ୍ରମଣ ଆଶଙ୍କା ରହିଛି । ସେଥିପାଇଁ ଏହି ସ୍ବତନ୍ତ୍ର ଟ୍ରେନ ବାରିପଦା ରେଳଷ୍ଟସନରେ ନରହି ସ୍ଥାନୀୟ ଭଞ୍ଜପୁର ରେଳଷ୍ଟେସନରେ ଅଟକାଇବାକୁ ନିଷ୍ପତି ହୋଇଥିବା ଜଣାପଡ଼ିଛି । ଜିଲ୍ଲାକୁ ପାଖାପାଖି ୧୨୦୦ରୁ ଅଧିକ ପ୍ରବାସୀ ଫେରିବାକୁ ଥିବାରୁ ସେମାନଙ୍କୁ ବସ୍ ଯୋଗେ ନିଜ ନିଜ ଅଞ୍ଚଳର ସଙ୍ଗରୋଧ କେନ୍ଦ୍ରକୁ ପଠାଇବା ପାଇଁ ଜିଲ୍ଲା ପ୍ରଶାସନ ବ୍ୟବସ୍ଥା କରିଛି ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
