ରାଇରଙ୍ଗପୁର: ମୟୁରଭଞ୍ଜ ଜିଲ୍ଲା ମହୁଲଡ଼ିହା ଥାନା ଅନ୍ତର୍ଗତ ଜାମୁନଣ୍ଡା ଗ୍ରାମର ଜଣେ ବ୍ୟକ୍ତିଙ୍କ ମୃତଦେହ ସାଳନ୍ଦୀ ନଦୀରୁ ଅଗ୍ନିଶମ ବିଭାଗ ସହାୟତାରେ ଉଦ୍ଧାର କରାଯାଇଛି। ମୃତ ବ୍ୟକ୍ତି ଜଣକ ହେଉଛନ୍ତି ଜାମୁନଣ୍ଡା ଗ୍ରାମର ସେଲାୟ ବୁଡିଓଲି(50)।
ସୂଚନା ଅନୁଯାୟୀ ଶୁକ୍ରବାର ସକାଳୁ ସେଲାୟ ଏକ ସାଇକେଲ ନେଇ ଘରୁ ବାହାରକୁ ଯାଇ ଆଉ ଘରକୁ ଫେରି ନଥିଲେ। ଶନିବାର ସନ୍ଧ୍ୟାରେ ଚିଆଁବେଡା-ଜାମୁନଣ୍ଡା ଗ୍ରାମ ରାସ୍ତାରେ ଥିବା ସାଳନ୍ଦୀ ନଦୀର ପୋଲ ନିକଟରୁ ତାଙ୍କ ସାଇକେଲ ମିଳିଥିଲା । ରବିବାର ସନ୍ଧ୍ୟାରେ ଗ୍ରାମ ନିକଟସ୍ଥ ସାଳନ୍ଦୀ ନଦୀର ଭୈରବ କୁଣ୍ଡ ନିକଟରେ ଏକ ମୃତଦେହ ଭାସୁଥିବାର ଦେଖି ଲୋକେ ମହୁଲଡିହା ଥାନା ଖବର ଦେଇଥିଲେ।
ଖବର ପାଇ ଠାକୁରମୁଣ୍ଡା ଅଗ୍ନିଶମ ବିଭାଗକୁ ଖବର ଦେବା ପରେ ବିଭାଗୀୟ କର୍ମଚାରୀ ଓ ମହୁଲଡ଼ିହା ପୋଲିସ ଯାଇ ନଦୀ ଭିତରୁ ଭାସୁଥିବା ମୃତଦେହକୁ ଉଦ୍ଧାର କରିବା ସହ ତାକୁ ଚିହ୍ନଟ କରିଥିଲେ। ଏନେଇ ମହୁଲଡ଼ିହା ଥାନା ପୋଲିସ ଏକ ଅପମୃତ୍ୟୁ ମାମଲା କେସ୍ ନଂ ୦୯/୧୯ ରୁଜୁ କରି ମୃତଦେହକୁ ବ୍ୟବଚ୍ଛେଦ ପାଇଁ ଆନନ୍ଦପୁର ଡାକ୍ତରଖାନା ପଠାଇ ଘଟଣାର ତଦନ୍ତ ଆରମ୍ଭ କରିଛି।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
