ରାଇରଙ୍ଗପୁର: ମୟୂରଭଞ୍ଜ ଜିଲ୍ଲା ୩୨ ନଂ ଜିଲ୍ଲାପରିଷଦ ଜୋନରେ ବିଜେପି ଦଳ ପକ୍ଷରୁ ଗାଁକୁ ଗାଁ, ଘରକୁ ଘର ଯାଇ ପ୍ରଚାରକୁ ଜୋରଦାର କରାଯାଉଥିବା ଦେଖିବାକୁ ମିଳିଛି । ୩୨ ନଂ ଜୋନରେ ବିଜେପି ଦଳ ପକ୍ଷରୁ ସରୋଜ କୁମାର ମହାନ୍ତ ଜିଲ୍ଲାପରିଷଦ ପ୍ରାର୍ଥୀ ଭାବେ କଣ୍ଟେଷ୍ଟ କରୁଛନ୍ତି । ୩୨ ନଂ ଜୋନଟି ୦୫ ଟି ଗ୍ରାମପଞ୍ଚାୟତ, ୮୨ଟି ୱାର୍ଡ ଓ ୨୧୬୦୯ ଭୋଟରଙ୍କ ଦ୍ଵାରା ଗଠିତ । ଗତ ୨୦୧୭ ପଞ୍ଚାୟତ ନିର୍ବାଚନରେ ୩୨ ନଂ ଜୋନରେ ବିଜେପି ପ୍ରାର୍ଥୀ ବିଜୟୀ ହୋଇଥିଲେ । ତେଣୁ, ଚଳିତ ନିର୍ବାଚନରେ ବିଜେଡି ଓ ଜେଏମଏମ ମଧ୍ୟ ରେସରେ ରହିଥିବାବେଳେ ବିଜେପି ଦଳ ପୁଣିଥରେ ଏହି ଜୋନ୍ ଦଖଲ କରିବା ପାଇଁ ପ୍ରୟାସ ଜାରି ରଖିଛି ।
୩୨ ନଂ ଜୋନ୍ ବିଜେପି ପ୍ରାର୍ଥୀ ତାଙ୍କ ସମର୍ଥକଙ୍କ ସହିତ ଗାଁଗାଁ ଘର ଘର ବୁଲି ଲୋକଙ୍କ ମୌଳିକ ସମସ୍ୟାର ସମାଧାନ କରିବା ପାଇଁ ଜୋରଦାର ପ୍ରଚାର କରିବା ସହ ଭୋଟ ଭିକ୍ଷା କରୁଛନ୍ତି । ତେବେ ରାଜ୍ୟ ସରକାରଙ୍କୁ ଟାର୍ଗେଟ କରିବା ସହ ବିଜାତଳା ବ୍ଲକରେ ହେଉଥିବା ଦୁର୍ନୀତିକୁ ନେଇ ଶାସକ ଦଳ ଉପରେ ବର୍ଷିଛନ୍ତି ଜିଲ୍ଲାପରିଷଦ ପ୍ରାର୍ଥୀ ସରୋଜ। ରାଜ୍ୟ ସରକାରଙ୍କ ଯେତେ ସବୁ ଜନହିତକର ଯୋଜନା ରହିଛି ତାହା ଦୁର୍ନୀତିଖୋର ନେତା ଓ ଅଫିସର ମାନଙ୍କ ପାଇଁ ଗ୍ରାମାଞ୍ଚଳର ଲୋକଙ୍କ ପାଖକୁ ପହଞ୍ଚି ପାରୁନାହିଁ ବୋଲି ସେ କହିଛନ୍ତି । ତେଣୁ, ଚଳିତ ପଞ୍ଚାୟତ ନିର୍ବାଚନରେ ମଧ୍ୟ ଜନସାଧାରଣଙ୍କ ବିଜେପି ପ୍ରତି ବିପୁଳ ସମର୍ଥନ ରହିଛି ଓ ଜନସାଧାରଣ ବିଜେପିକୁ ଭୋଟ ଦେଇ ଜୟଯୁକ୍ତ କରାଇବେ ବୋଲି ଦୃଢୋକ୍ତି ପ୍ରକାଶ କରିଛନ୍ତି ବିଜେପି ଦଳର ଜିଲ୍ଲାପରିଷଦ ପ୍ରାର୍ଥୀ ସରୋଜ ମହାନ୍ତ।
ରାଇରଙ୍ଗପୁରରୁ ସଞ୍ଜୟ କୁମାର ପରିଡା, ଇଟିଭି ଭାରତ
