ବାରିପଦା: ନିଶାରେ ସାନଭାଇକୁ ହାଣି ହତ୍ୟା କଲା ବଡ଼ ଭାଇ । ମୟୂରଭଞ୍ଜ ଜିଲ୍ଲା ବେତନଟୀ ଥାନା ଅଧିନ ଦୁର୍ଗାପୁର ପଞ୍ଚାୟତ ଭାଲୁକଚୁଆ ଖଡ଼ିଆସାହିରେ ଏଭଳି ଏକ ଅଭାବନୀୟ ଘଟଣା ଘଟିଛି । ରବିବାର ବିଳମ୍ବିତ ରାତିରେ ଭାଲୁକଚୁଆ ଗ୍ରାମର ନର ଦେହୁରୀଙ୍କ ବଡ଼ ପୁଅ ରୁହିଆ ଦେହୁରୀ ନିଶାଗ୍ରସ୍ତ ଅବସ୍ଥାରେ ଘରକୁ ଫେରିଥିଲା । ସେହି ସମୟରେ ଜ୍ବରରେ ଘରେ ଶୋଇଥିବା ସାନଭାଇ ଶମ୍ଭୁ ଦେହୁରୀଙ୍କୁ କୁରାଢ଼ୀରେ ହାଣି ହତ୍ୟା କରିଥିଲା ରୁହିଆ ।
ତେବେ ହତ୍ୟାକାଣ୍ଡର ପ୍ରକୃତ କାରଣ ଜଣାପଡି ନାହିଁ । ଘଟଣାସ୍ଥଳରେ ପୋଲିସ ପହଞ୍ଚି ପରିବାର ଲୋକଙ୍କ ବୟାନ ରେକର୍ଡ କରିବା ସହ ତଦନ୍ତ ଆରମ୍ଭ କରିଛି । ନିଶାଗ୍ରସ୍ତ ଅବସ୍ଥାରେ ଏହି ହତ୍ୟାକାଣ୍ଡ ଘଟାଇଥିବା ନେଇ ପ୍ରାଥମିକ ତଦନ୍ତରୁ ପୋଲିସ ସନ୍ଦେହ କରୁଛି ।
ଖବର ପାଇ ବେତନଟି ଥାନା ଏବଂ ବଡ଼ଜାମବଣି ଫାଣ୍ଡି ପୋଲିସ ସହ ସାଇଣ୍ଟିଫିକ ଟିମ ମଧ୍ୟ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ପୋଲିସ ମୃତଦେହକୁ ଜବତ କରି ବାରିପଦା ପି ଆରଏମ୍ ମେଡ଼ିକାଲ କଲେଜ ଏଣ୍ଡ ହସ୍ପିଟାଲକୁ ବ୍ୟବଚ୍ଛେଦ ପାଇଁ ପଠାଇଛି ।ଏହାସହ ହତ୍ୟାକାରୀ ବଡଭାଇ ରୁହିଆ ଦେହୁରୀକୁ ଗିରଫ କରିଛି ପୋଲିସ। ବେତନଟି ପୋଲିସ ଘଟଣାର ଅଧିକ ତଦନ୍ତ ଜାରି ରଖିଛି ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
