ରାଇରଙ୍ଗପୁର: ପୂର୍ବତନ ପ୍ରେମିକାକୁ ବ୍ଲାକମେଲ କରିବା ପଡ଼ିଲା ମହଙ୍ଗା । ଶେଷରେ ପାଗଳ ପ୍ରେମିକ ଗଲା ଜେଲ । ଏପରି ଏକ ଅଭାବନୀୟ ଘଟଣା ଘଟିଛି ମୟୂରଭଞ୍ଜ ଜିଲ୍ଲା ବହଳଦା ଥାନା ଅନ୍ତର୍ଗତ ବାସିଙ୍ଗି ଗ୍ରାମରେ ।
ସୂଚନା ଅନୁଯାୟୀ, ବାସିଙ୍ଗି ଗ୍ରାମର ଯଶୋବନ୍ତ ଭଞ୍ଜ ନାମକ ଜଣେ ଯୁବକ ଉକ୍ତ ଗ୍ରାମର ଜଣେ ଯୁବତୀଙ୍କୁ ଭଲ ପାଉଥିଲେ । କିନ୍ତୁ ଯୁବତୀଙ୍କ ସହିତ ଯଶୋବନ୍ତର ବାହାଘର କଥା ଉଠିବାରୁ ଯଶୋବନ୍ତର ଘର ଲୋକେ ରାଜି ହୋଇନଥିଲେ । ପରେ ଜନୈକ ଯୁବତୀଙ୍କୁ ପରିବାର ଲୋକେ ଅନ୍ୟ ଜାଗାରେ ବିବାହ କରିଦେଇଥିଲେ ।
ତେବେ ଯୁବତୀଙ୍କ ବିବାହର ତିନି ମାସ ପରେ ପ୍ରେମିକ ଯଶୋବନ୍ତ ପ୍ରତିଶୋଧ ପରାୟଣ ହୋଇ ଯୁବତୀଙ୍କୁ ଫୋନରେ ମାରି ଦେବାର ଧମକ ଦେଉଥିଲେ । ଏଥିସହ ଯୁବତୀଙ୍କୁ ଅଶ୍ଳୀଳ ଇଙ୍ଗିତ କରିବା ସହ ଯୁବତୀଙ୍କ ଶାଶୁ ଘର କାନ୍ଥରେ ନିଜ ଫୋଟ ସହ ଯୁବତୀଙ୍କ ଫଟୋକୁ ଲଗାଇ ବ୍ଲାକମେଲ କରୁଥିଲା ।
ଏହାପରେ ଯୁବତୀ ଜଣକ ଥାନାରେ ଲିଖିତ ଅଭିଯୋଗ କରିବା ପରେ ବୁଧବାର ବହଳଦା ପୋଲିସ ପାଗଳ ପ୍ରେମିକକୁ ଗିରଫ କରିବା ସହ କୋର୍ଟ ଚାଲାଣ କରିଛି ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
