ରାଇରଙ୍ଗପୁର: ମୟୁରଭଞ୍ଜ ଜିଲ୍ଲା ରାଇରଙ୍ଗପୁର ବନଖଣ୍ଡ ଅନ୍ତର୍ଗତ ବିଶୋଇ ବନବିଭାଗ ପକ୍ଷରୁ ଲକ୍ଷାଧିକ ଟଙ୍କାର କେନ୍ଦୁପତ୍ର ଜବତ କରାଯାଇଛି । ଏହା ସହିତ ବନବିଭାଗ ଚାରୋଟି ବାଇକ ଓ ଏକ ମହିନ୍ଦ୍ରା ଭ୍ୟାନକୁ ଜବତ କରିଛି । ବିଶୋଇ ରେଞ୍ଜର ବନାଞ୍ଚଳ ଅଧିକାରୀ ତପନ କୁମାର ମିଶ୍ରଙ୍କ ନେତୃତ୍ବରେ ଏକ ଦଳ ଦୁଇ ଦିନରେ ଲକ୍ଷାଧିକ ଟଙ୍କାର କେନ୍ଦୁପତ୍ର ଜବତ କରିଛନ୍ତି ।
ସୂଚନା ଅନୁଯାୟୀ କୌଣସି ସୁତ୍ରରୁ ଖବର ପାଇ ମଙ୍ଗଳବାର ବିଳମ୍ବିତ ରାତିରେ ବିଶୋଇ ବନବିଭାଗ ପକ୍ଷରୁ ବିଶୋଇ ରେଞ୍ଜ ଅଧିନସ୍ଥ ନଙ୍ଗଳବେଣ୍ଟା ପୋଖରିଆ ଗାଁ ନିକଟରୁ ଏକ କେନ୍ଦୁପତ୍ର ବୋଝେଇ ଭ୍ୟାନ ଜବତ କରାଯାଇଛି । ଚୋରାରେ କେନ୍ଦୁପତ୍ର ବୋଝେଇ କରି ଯାଉଥିବା ସମୟରେ ଚଢ଼ାଉ କରାଯାଇଥିଲା । ତେବେ ଭ୍ୟାନ ଚାଳକ ଜଣକ ଘଟଣାସ୍ଥଳରୁ ଫେରାର ହୋଇଯାଇଛନ୍ତି । ଭ୍ୟାନରେ ଅଢେ଼ଇ କୁଇଣ୍ଟାଲ କେନ୍ଦୁପତ୍ର ଥିବା ବେଳେ ଏହାର ଆନୁମାନିକ ମୂଲ୍ୟ ୫୦୦୦୦ ଟଙ୍କା ରୁ ଉର୍ଦ୍ଧ୍ବ ହେବ ବୋଲି ବନବିଭାଗ ସୂଚନା ଦେଇଛି ।
ରାତି ପ୍ରାୟ ୧୨.୩୦ ସମୟରେ ବିଶୋଇ ରେଞ୍ଜ ଅଧିନସ୍ଥ ପୁଣ୍ଡିଦା ଗାଁ ନିକଟ ହେନସାବେଡା ଛକ ନିକଟରୁ ବନବିଭାଗ ପକ୍ଷରୁ ପୁଣି ଚାରୋଟି ବାଇକ୍ ରେ କେନ୍ଦୁପତ୍ର ଚୋରା ଚାଲାଣ ବେଳେ ଧରାପଡିଛନ୍ତି । ସୂଚନା ଅନୁଯାୟୀ ଖବର ପାଇ ଚାରୋଟି ବାଇକ ରେ ଥିବା ପ୍ରାୟ ଚାରି କୁଇଣ୍ଟାଲ କେନ୍ଦୁପତ୍ର ବନବିଭାଗ ଜବତ କରିଛି । ବାଇକ ଚାଳକ ମାନେ ଫେରାର ହୋଇଯାଇଛନ୍ତି । ଜବତ କେନ୍ଦୁପତ୍ରର ଆନୁମାନିକ ମୂଲ୍ୟ ୭୦ ହଜାର ଟଙ୍କାରୁ ଉର୍ଦ୍ଧ୍ବ ହେବ ବୋଲି ବନବିଭାଗ ସୂଚନା ଦେଇଛି । ଏ ନେଇ ବିଶୋଇ ବନବିଭାଗ ଏକ ମାମଲା ରୁଜୁ କରିଛି ।
ରାଇରଙ୍ଗପୁରରୁ ସଞ୍ଜୟ କୁମାର ପରିଡା, ଇଟିଭି ଭାରତ
