ରାଇରଙ୍ଗପୁର: ପ୍ରବଳ ଗ୍ରୀଷ୍ମପ୍ରବାହ ଯୋଗୁଁ ପାହାଡ଼ରେ କାମ କରୁଥିବା ଜଣେ ଶ୍ରମିକଙ୍କ ଅଂଶୁଘାତରେ ମୃତ୍ୟୁ ହୋଇଛି । ଏପରି ଏକ ଅଭାବନୀୟ ଘଟଣା ଘଟିଛି ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ଗ୍ରାମାଞ୍ଚଳ ଥାନା ଅଧିନସ୍ଥ ବୋଡାଦର ଗ୍ରାମ ନିକଟରେ ଥିବା ଏକ ପାହାଡ଼ରେ ।
ମୃତକ ଯୁବକ ଜଣେ ହେଲେ ବୋଡାଦର ଗ୍ରାମର ସନ୍ତୋଷ ମହାନ୍ତ(୪୫)। ସୂଚନା ଅନୁଯାୟୀ ଉକ୍ତ ପାହାଡରେ ସନ୍ତୋଷ ପଥର ଫଟାଇବା କାମ କରନ୍ତି । ତେବେ ପ୍ରବଳ ଖରାରେ ସେଠାରେ କାମ କରୁଥିବା ସମୟରେ ହଠାତ୍ ଅସୁସ୍ଥତା ଅନୁଭବ କରି ଅଚେତ ହୋଇ ଯାଇଥିଲେ । ତୁରନ୍ତ ତାଙ୍କ ସହଯୋଗୀମାନେ ଉଦ୍ଧାର କରି ତାଙ୍କୁ ରାଇରଙ୍ଗପୁର ଡାକ୍ତରଖାନା ଆଣିଥିଲେ । ତେବେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
ଏନେଇ ରାଇରଙ୍ଗପୁର ଗ୍ରାମାଞ୍ଚଳ ପୋଲିସ ଶବ ବ୍ୟବଚ୍ଛେଦ ପାଇଁ ରାଇରଙ୍ଗପୁର ଡାକ୍ତରଖାନା ପଠାଇବା ସହ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଆରମ୍ଭ କରିଛି । ହେଲେ ପରିବାର ଲୋକେ ଏହା ଅଂଶୁଘାତ ଜନିତ ମୃତ୍ୟୁ ବୋଲି ଅଭିଯୋଗ କରିଛନ୍ତି ।
ରାଇରଙ୍ଗପୁରରୁ ସଞ୍ଜୟ କୁମାର ପରିଡା, ଇଟିଭି ଭାରତ
