ରାଇରଙ୍ଗପୁର: କରଞ୍ଜିଆ ପୋଲିସର ବଡ ସଫଳତା । ଅବସରପ୍ରାପ୍ତ ଶିକ୍ଷକଙ୍କ ଠାରୁ ଲକ୍ଷେ ଟଙ୍କା ଲୁଟ ଘଟଣାରେ ସଂପୃକ୍ତ ଦୁର୍ବୃତ୍ତକୁ କାବୁ କଲା ପୋଲିସ । ଅଭିଯୁକ୍ତ ଜଣକ ଭଦ୍ରକ ଜିଲ୍ଲା ଭଣ୍ଡାରୀ ପୋଖରୀ ଅଞ୍ଚଳର ଗୋପୀ ଦାସ । ଯାଜପୁର ରୋଡ ନିକଟରୁ ଅଭିଯୁକ୍ତକୁ କରଞ୍ଜିଆ ପୋଲିସ ଗିରଫ କରିଛି । ତା' ନିକଟରୁ 70 ହଜାର ଟଙ୍କା ଜବତ କରାଯାଇଛି । ଏହି ଲୁଟରେ ଜଡିତ ଅନ୍ୟ ଅଭିଯୁକ୍ତକୁ ଖୁବଶୀଘ୍ର ଗିରଫ କରାଯିବା ନେଇ ସୂଚନା ଦେଇଛନ୍ତି ଉପଖଣ୍ଡ ପୋଲିସ ଅଧିକାରୀ ସତ୍ୟବିକାଶ ଭୁଆଁ ।
ସୂଚନା ଅନୁଯାୟୀ, ଗତ 29 ତାରିଖରେ ଷ୍ଟେଟବ୍ୟାଙ୍କ ଶାଖାରୁ ଅବସରପ୍ରାପ୍ତ ଶିକ୍ଷକ ରହିଣା ମହାନ୍ତ ଲକ୍ଷେ ଟଙ୍କା ଉଠାଇ ଘରକୁ ଯାଉଥିବା ବେଳେ ମୟୂରଭଞ୍ଜ କରଞ୍ଜିଆ ସହରର କଲେଜ ଛକ ନିକଟରେ ମଟର ସାଇକେଲ ରଖି କ୍ଷୀର କିଣିଥିଲେ । କ୍ଷୀରକୁ ଡିକିରେ ରଖିବା ବେଳେ ଦୁଇ ଜଣ ଦୁର୍ବୃତ୍ତ ଡିକି ମଧ୍ୟରୁ ସମସ୍ତ ଟଙ୍କା ନେଇ ଚମ୍ପଟ ମାରିଥିଲେ । ଏନେଇ ଥାନାରେ ଅଭିଯୋଗ ହେବା ପରେ ମୟୂରଭଞ୍ଜ ଆରକ୍ଷୀ ଅଧିକ୍ଷକଙ୍କ ନେତୃତ୍ବରେ ଏକ ସ୍ବତନ୍ତ୍ର ଟିମ ଗଠନ କରାଯାଇଥିଲା । ପରେ ଟିମ୍ ଲୁଟରେ ସଂପୃକ୍ତ ଜଣେ ଅଭିଯୁକ୍ତର ସନ୍ଧାନ ପାଇ ଘଟଣାସ୍ଥଳରେ ଚଢାଉ କରି ତାକୁ ଗିରଫ କରିଛି । ଅନ୍ୟ ଜଣେ ଅଭିଯୁକ୍ତ କଲିକତା ଅଞ୍ଚଳର ହୋଇଥିବା ବେଳେ ଖୁବଶୀଘ୍ର ତାଙ୍କୁ ମଧ୍ୟ ଗିରଫ କରାଯିବା ନେଇ ସାମ୍ବାଦିକ ସମ୍ମିଳନୀରେ ଉପଖଣ୍ଡ ପୋଲିସ ଅଧିକାରୀ ସତ୍ୟବିକାଶ ଭୁଆଁ ସୂଚନା ଦେଇଛନ୍ତି । କିଛି ଦିନ ହେବ କରଞ୍ଜିଆ ଅଞ୍ଚଳରେ ଲୁଟ ଓ ଡକାୟତି ଭଳି ମାମଲା ମୁଣ୍ଡ ଟେକିଥିବା ବେଳେ କରଞ୍ଜିଆ ପୋଲିସ ଏଭଳି ଏକ ବଡ ସଫଳତା ହାସଲ କରିଛି ।
ରାଇରଙ୍ଗପୁରରୁ ସଞ୍ଜୟ କୁମାର ପରିଡା, ଇଟିଭି ଭାରତ
