ରାଇରଙ୍ଗପୁର: ଚରିତ୍ର ଉପରେ ସନ୍ଦେହ କରି ସ୍ତ୍ରୀକୁ ବିଭତ୍ସ ଭାବେ ହତ୍ୟା କଲା ସ୍ୱାମୀ । ମୟୂରଭଞ୍ଜ ଜିଲ୍ଲା ଠାକୁରମୁଣ୍ଡା ବ୍ଲକ ଅନ୍ତର୍ଗତ ହାତୀଗୋଡା ଗ୍ରାମ କୁମ୍ଭାରସାହିରେ ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି । ସ୍ତ୍ରୀକୁ ହତ୍ୟା କରି ଠାକୁରମୁଣ୍ଡା ଥାନାରେ ଆତ୍ମ ସମର୍ପଣ କରିଛି ଅଭିଯୁକ୍ତ ସ୍ବାମୀ ।
ସ୍ତ୍ରୀର ଚରିତ୍ରକୁ ସନ୍ଦେହ କରି ସ୍ବାମୀ ରାଜେନ୍ଦ୍ର ମହାକୁଡ଼ ଏକ କଟୂରୀରେ ଅତି ନିର୍ମମ ଭାବେ ହତ୍ୟା କରି ଶରୀରରୁ ମୁଣ୍ଡକୁ ଅଲଗା କରିଥିଲା । ଏହାପରେ ପାଖ ବଖରାରେ କଟା ମୁଣ୍ଡଟିକୁ ପୋତି ଦେବାକୁ ଚେଷ୍ଟା କରିଥିଲା । କିନ୍ତୁ କୈାଣସି କାରଣରୁ ବିଫଳ ହେବାରୁ ହାତରେ କଟୂରୀ ଧରି ଠାକୁରମୁଣ୍ଡା ଥାନାରେ ଆତ୍ମ ସମର୍ପଣ କରିବା ପାଇଁ ଆସି ପହଞ୍ଚିଥିଲା ।
ତେବେ ପୋଲିସ ଅଭିଯୁକ୍ତ ରାଜେନ୍ଦ୍ରକୁ ଗିରଫ କରିବା ପରେ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିବା ସହିତ ଅଧିକ ତଦନ୍ତ ପାଇଁ ବାରିପଦାରୁ ସାଇଣ୍ଟିଫିକ ଟିମ ଡକାଇଥିଲେ । ସାଇଣ୍ଟିଫିକ ଟିମର ତଦନ୍ତ ପରେ ଠାକୁରମୁଣ୍ଡା ଥାନା ପୋଲିସ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ କରଞ୍ଜିଆ ଡ଼ାକ୍ତରଖାନାକୁ ପଠାଇଥିବା ଜଣାପଡିଛି ।
ଇଟିଭି ଭାରତ, ରାଇରଙ୍ଗପୁର
