ବାରିପଦା: ମୟୂରଭଞ୍ଜର ଉଦଳା ଅଞ୍ଚଳ ଏବେ ଲୁଟେରାଙ୍କ ପାଇଁ ଚରାଭୂଇଁ ପାଲଟିଛି । ଏଠାରେ ଦିନକୁ ଦିନ ଲୁଟତରାଜ, ରାହାଜାନି, ଛିନତାଇ ଭଳି ଘଟଣା ବଢିବାରେ ଲାଗିଛି। ଯାହା ପୋଲିସ ପାଇଁ ଏବେ ବଡ ଚ୍ୟାଲେଞ୍ଜ ହୋଇଛି । ବୁଧବାର ଦିନଦିପ୍ରହରରେ ଘଟିଛି ଛିନତାଇ । ଉଦଳା ଥାନା ଅଧିନସ୍ଥ ନାଗପାଳ ୟୁଜିଏମଇ ବିଦ୍ୟାଳୟ ନିକଟସ୍ଥ ଏକ ଜନଗହଳିପୂର୍ଣ୍ଣ ରାସ୍ତାରୁ ଜଣେ ମହିଳାଙ୍କ ବେକରୁ ସୁନାଚେନ୍ ଲୁଟି ନେଇଛନ୍ତି ଦୁଇ ଲୁଟେରା । ଏହି ଦୃଶ୍ୟ ସିସିଟିଭିରେ କଏଦ ହୋଇଛି ।
ଉଦଳା ଏନଏସି ୩ନଂ ୱାର୍ଡର ବାସିନ୍ଦା ଶକୁନ୍ତଳା ରାଉତ ନାଗପାଳ, ୟୁଜିଏମଇ ବିଦ୍ୟାଳୟ ନିକଟରେ ରହୁଥିବା ତାଙ୍କ ଭଉଣୀଙ୍କ ଘରକୁ ଯାଇଥିଲେ। ଏହି ସମୟରେ ଦୁଇ ଜଣ ଲୁଟେରା ଏକ ବାଇକ୍ରେ ଆସି ତାଙ୍କର ପିଛା କରିଥିଲେ । ହଠାତ ଲୁଟେରା ତାଙ୍କ ବେକରୁ ସୁନା ଚେନକୁ ଜବରଦସ୍ତ ଛିଣ୍ଡାଇ ନେଉଥିବା ବେଳେ ସେ ଏହାକୁ ବିରୋଧ କରିଥିଲେ । ଗାଡ଼ିରେ ବସିଥିବାରୁ ସୁନାଚେନ୍ ଟାଣି ନପାରିବାରୁ ଲୁଟେରା ବାଇକ୍ରୁ ଓହ୍ଲାଇ ତାଙ୍କୁ ତଳେ ପକାଇ ଜୋର ଜବରଦସ୍ତ ସୁନାଚେନ୍ ଲୁଟି ନେଇଥିଲା ।
ଏହାପରେ ଲୁଟେରା ଘଟଣାସ୍ଥଳ ଫେରାର ହୋଇଯାଇଥିଲେ । ଏନେଇ ସେ ଥାନାରେ ଲିଖିତ ଅଭିଯୋଗ କରିଥିବା ବେଳେ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ଲୁଟ୍ ହୋଇଥିବା ଚେନର ଆନୁମାନିକ ମୂଲ୍ୟ ୭୦ ହଜାର ଟଙ୍କାରୁ ଅଧିକ ହେବ ବୋଲି ଜଣାପଡିଛି।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
