ବାରିପଦା: ଚଳିତ ବର୍ଷ ଆଇପିଏଲର ଫଳାଫଳ ପାଇଁ ବାଜି ଲଗାଇ ଜୁଆ ଖେଳ ଖେଳୁଥିବା ସଂପର୍କରେ ଜିଲ୍ଲା ଏସପିଙ୍କୁ ସୂଚନା ମିଳିଥିଲା । ତେବେ ପୋଲିସ ଜିଲ୍ଲାର ବିଭିନ୍ନ ସ୍ଥାନରେ ଚଢାଉ କରି 3 ଜଣ ଜୁଆଡିଙ୍କୁ ଗିରଫ କରିବାରେ ସକ୍ଷମ ହୋଇଥିବା ସୂଚନା ମିଳିଛି ।
ଦେଶର ସବୁଠୁ ବଡ କ୍ରିକେଟ ଲିଗ ପାଇଁ ସମସ୍ତେ ଉତ୍ସାହିତ ରହିଥାନ୍ତି । ତେବେ ଚଳିତ ବର୍ଷର ଆଇପିଏଲର ଫାଇନାଲ ମ୍ୟାଚ ଗତ ନଭେମ୍ବର 10 ତାରିଖରେ ଥିଲା । ଏହି ଖେଳର ଫଳାଫଳକୁ ବାଜି ଲଗାଇ ଜିଲ୍ଲାରେ ଜୁଆ ଖେଳ ହେଉଥିବା ଏସପିଙ୍କୁ ବିଶେଷ ସୂ୍ତ୍ରରୁ ଖବର ମିଳିଥିଲା । ଖବର ପାଇବା ପରେ ପୋଲିସ ଜିଲ୍ଲାର ବିଭିନ୍ନ ସ୍ଥାନମାନଙ୍କରେ ଚଢାଉ କରିଥିଲା ।
ତେବେ ଏ ସଂକ୍ରାନ୍ତରେ ବାରିପଦା ପୌରାଞ୍ଚଳର ତୁଳସୀ ଚୌରା ସାହିର ତ୍ରିଲୋଚନ ସାହୁ, ବୁଢୀଖମାରୀ ଗାଁର ନାରାୟଣ ମଣ୍ଡଳ ଏବଂ ବାବୁସାହିର ସରୋଜ କୁମାର ସାହୁଙ୍କୁ ପୋଲିସ ଗିରଫ କରିବାରେ ସଫଳ ହୋଇଥିଲା । ସେମାନଙ୍କ ଠାରୁ ପୋଲିସ 41 ହଜାର 130 ଟଙ୍କା ଏବଂ 3ଟି ମୋବାଇଲ ଫୋନ ଜବତ କରିଛି। ଗୁରୁବାର ବିଳମ୍ବିତ ରାତ୍ରିରେ 3 ଜଣଙ୍କୁ କୋର୍ଟ ଚାଲାଣ କରାଯାଇଛି।
ଜିଲ୍ଲାର ବାରିପଦା ସହରରେ କ୍ରିକେଟ ଖେଳକୁ ନେଇ ଜୁଆ ଖେଳିବା ପ୍ରଥମ ଘଟଣା । ତେବେ ଏହି ରାକେଟର ଗଭୀରକୁ ପଶିବା ପାଇଁ ପୋଲିସ ଅଧିକ ତଦନ୍ତ ଜୋରସୋରରେ ଜାରି ରଖିଥିବା ବେଳେ ଏହାର ମାଷ୍ଟର ମାଇଣ୍ଡକୁ ଯଥାଶୀଘ୍ର ଗିରଫ କରାଯିବ ବୋଲି ବାରିପଦା ଟାଉନ ଥାନା ଅଧିକାରୀ କହିଛନ୍ତି।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
