ରାଇରଙ୍ଗପୁର: ମୟୂରଭଞ୍ଜ ଜିଲ୍ଲା କରଞ୍ଜିଆ ବନଖଣ୍ଡ ଅଞ୍ଚଳରେ ୨୦ ଦିନ ହେଲାଣି ହାତୀ ଉପଦ୍ରବ ଜାରି ରହିଛି । ଗତ ୨୦ ଦିନ ମଧ୍ୟରେ ବ୍ୟାପକ ଧାନ ଫସଲ ନଷ୍ଟ କରିବା ସହିତ ୮ ରୁ ୧୦ ଟି ଘର ମଧ୍ୟ ଭାଙ୍ଗିଲେଣି ହାତୀପଲ ।
ତେବେ ଦୁଧିଆଣି ରେଞ୍ଜ ଅନ୍ତର୍ଗତ ଦରି ଗ୍ରାମପଞ୍ଚାୟତ ତଟା ସାହିରେ ଦେଖିବାକୁ ମିଳିଛି କିଛି ଅଭାବନୀୟ ଦୃଶ୍ୟ । ତଟା ସାହିରେ ଦିନବେଳା ହାତୀମାନେ ଜଙ୍ଗଲରୁ ବାହାରି ଆସି ଏକ ପଡ଼ିଆ ନିକଟରେ ରୁଣ୍ଡ ହୋଇଥିଲେ । ଠିକ ସେତିକି ବେଳେ ଗ୍ରାମର ଗାଈ ଗୋଠମାନେ ହାତୀକୁ ଦେଖି ସଙ୍ଘବଦ୍ଧ ଭାବେ ହାତୀ ନିକଟକୁ ଦୌଡି ଯାଇ ମିଶି ଯାଇଥିଲେ । ଯାହାଫଳରେ ହାତୀମାନେ ମଧ୍ୟ ଏପଟସେପଟ ଦୌଡ଼ି ବଳଦ ଗୋଠ ସହିତ ମିଶି ଯାଇଥିଲେ ।
ତେବେ ସ୍ଥାନୀୟ ଲୋକମାନେ ମଧ୍ୟ ଏହି ଦୃଶ୍ୟ ଦେଖି ହୋ ହାଲ୍ଲା କରିବାରୁ ହାତୀ ଏବଂ ବଳଦମାନେ ଏଣେତେଣେ ଦୌଡାଦୌଡ଼ି କରିଥିବାର ଦୃଶ୍ୟ ଦେଖିବାକୁ ମିଳିଥିଲା । ତେବେ ହାତୀ ସହିତ ବଳଦମାନେ ମିଶି ଯାଇଥିଲେ ବି ହାତୀମାନେ କାହାରି କିଛି କ୍ଷତି କରି ନାହାଁନ୍ତି । ଏପରି ବିରଳ ଦୃଶ୍ୟ ସ୍ଥାନୀୟ ଅଞ୍ଚଳରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି ।
ରାଇରଙ୍ଗପୁରରୁ ସଞ୍ଜୟ କୁମାର ପରିଡା , ଇଟିଭି ଭାରତ
