ରାଇରଙ୍ଗପୁର: ପୋଖରୀରୁ ଭାସମାନ ଅବସ୍ଥାରେ ଯୁବକଙ୍କ ମୃତଦେହ ଉଦ୍ଧାର ହୋଇଛି। ଏପରି ଏକ ଅଭାବନୀୟ ଘଟଣାଦେଖିବାକୁ ମିଳିଛି ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ଗ୍ରାମାଞ୍ଚଳ ଥାନା ଅଧୀନସ୍ଥ ମୁଶାବଣୀ ଗାଁରେ। ଗାଁ ନିକଟରେ ଥିବା ଏକ ପୋଖରୀରେ ମୃତଦେହ ଭାସୁଥିବା ଦେଖି ପ୍ରଥମେ ପୋଲିସକୁ ଖବର ଦେଇଥିଲେ ଗ୍ରାମବାସୀ।
ଭିଡିଓ ସୌଜନ୍ୟ: ପ୍ରତିନିଧି,ରାଇରଙ୍ଗପୁର
ମୃତ ଯୁବକ ଜଣକ ହେଲେ କାଦୁଆଣୀ ଗାଁର ଜିତ ମୋହନ ବେହେରା। ପରିବାର ଲୋକଙ୍କ ସୂଚନା ଅନୁସାରେ, ରବିବାର ଠାରୁ ସେ ଘରୁ ନିଖୋଜ ଥିଲେ। ସୋମବାର ସକାଳୁ ତାଙ୍କର ମୃତଦେହ ଉଦ୍ଧାର କରାଯାଇଛି। କେହି ଜଣେ ତାଙ୍କୁ ହତ୍ୟା କରି ପୋଖରୀରେ ଫୋପାଡି ଦେଇଥିବା ଅନୁମାନ କରାଯାଉଛି।
ପୋଖରୀ ତୁଠରେ ମୃତ ଯୁବକଙ୍କ ପୋଷାକ ଓ ଚପଲପଡ଼ିଥିବା ଦେଖିବାକୁ ମିଳିଥିଲା। ରାଇରଙ୍ଗପୁର ଗ୍ରାମାଞ୍ଚଳ ପୋଲିସ ଘଟଣାସ୍ଥଳରେ ପହଞ୍ଚି ପୋଷାକ ଓ ଚପଲ ଜବତ କରିଛି । ମୃତଦେହକୁ ବ୍ୟବଚ୍ଛେଦ ପାଇଁ ରାଇରଙ୍ଗପୁର ଡାକ୍ତରଖାନା ପଠାଇବା ସହ ଘଟଣାର ତଦନ୍ତ ଆରମ୍ଭ କରିଛି।
ରାଇରଙ୍ଗପୁରୁ ସଂଜୟ ପରିଡା,ଇଟିଭି ଭାରତ
