ରାଇରଙ୍ଗପୁର: ବେଆଇନ ଗୋଚାଲାଣ ବେଳେ ପୋଲିସର ଚଢାଉ । ରାଇରଙ୍ଗପୁର ଗ୍ରାମାଞ୍ଚଳ ଥାନା କାଦୁଆଣି ଛକ ନିକଟରୁ ବୁଧବାର ଏକ ଗୋରୁ ବୋଝେଇ ଟ୍ରକ ଜବତ କରାଯାଇଛି । ଟ୍ରକ ମଧ୍ୟରୁ ପ୍ରାୟ 38 ଟି ଗୋରୁ ଉଦ୍ଧାର କରାଯାଇଛି । ଏହି ଚୋରା ଗୋଚାଲାଣରେ ସମ୍ପୃକ୍ତ ଚାରି ଜଣ ବ୍ୟକ୍ତିଙ୍କୁ ପୋଲିସ ଗିରଫ କରିଥିବା ନେଇ ସୂଚନା ମିଳିଛି । ଅଭିଯୁକ୍ତମାନେ କଟକ ଜିଲ୍ଲା ସାଲେପୁର ଥାନ ଅଞ୍ଚଳର ଏସକେ ତାରିଫ, ଏସକେ ଅଫସାର, ଏସକେ ଉଆଶାକ ଖାଁ ଏବଂ ତାରିକୁଦ୍ଦିନ ଖାଁ ହୋଇଥିବା ଜଣାପଡିଛି ।
ଦୀର୍ଘ ଦିନ ଧରି ବାମନଘାଟି ଉପଖଣ୍ଡରେ ବେଆଇନ ଭାବେ ଗୋଚାଲାଣ ହେଉଥିଲା । ତେବେ ବୁଧବାର ଗୋଟିଏ ଟ୍ରକ ଯୋଗେ ଅମାନୁଷିକ ଭାବେ ଗାଇଙ୍କୁ ଚାଲାଣ କରାଯାଉଥିବା ନେଇ ପୋଲିସ ସୁରାକ୍ ପାଇଥିଲା । ଏହାପରେ ରାଇରଙ୍ଗପୁର ଗ୍ରାମାଞ୍ଚଳ ପୋଲିସ କାଦୁଆଣି ଛକ ନିକଟରେ ଟ୍ରକ ଉପରେ ଚଢାଉ କରିଥିଲା । ଗାଡିରୁ ଅତି ଦୟନୀୟ ଅବସ୍ଥାରେ 38 ଟି ଗାଇଙ୍କୁ ପୋଲିସ ଉଦ୍ଧାର କରିଛି । ଟ୍ରକରେ ଥିବା ଚାରି ଜଣ ଯୁବକଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି ।
ରାଇରଙ୍ଗପୁରରୁ ସଞ୍ଜୟ କୁମାର ପରିଡା, ଇଟିଭି ଭାରତ
