ରାଇରଙ୍ଗପୁର: ବାଘ ସହ ଲଢେ଼ଇ କରି ଭାଉଜକୁ ରକ୍ଷା କଲା ଦିଅର । ଉଭୟ ଦିଅର ଓ ଭାଉଜ ଆହତ। ଭାଉଜକୁ କଲରା ପତାରିଆ ବାଘ ଆକ୍ରମଣ କରିଥିବା ବେଳେ ଚିତ୍କାର ଶୁଣି ବାଘ ସହ ଲଢେଇ କରି ବାଘ କବଳରୁ ଭାଉଜକୁ ରକ୍ଷା କରିଛି ଦିଅର । ଏଭଳି ଏକ ଘଟଣା ଘଟିଛି ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ବନଖଣ୍ଡ ବିଶୋଇ ରେଞ୍ଜ ଅନ୍ତର୍ଗତ ତାରଣା ଗ୍ରାମରେ।
ସୂଚନା ଅନୁଯାୟୀ, ଭୋର ପାଖାପାଖି ୩ଟା ସମୟରେ ବିଶୋଇ ବ୍ଲକ ତାରଣା ଗାଁର ମାଇନୋ ହାଁସଦା ପରିଶ୍ରା କରିବାକୁ ଉଠିଥିଲେ । ଏହି ସମୟରେ ଏକ କଲରାପତାରିଆ ବାଘ ଆକ୍ରମଣର ଶିକାର ହୋଇ ଚିତ୍କାର କରିଥିଲେ l ବାଘଟି ଭାଉଜଙ୍କୁ ଆକ୍ରମଣ କରୁଥବା ଦେଖି ଦିଅର ବାଘର ବେକକୁ ଧରି ବାଘ ସହ ଲଢେ଼ଇ କରି ଭାଉଜଙ୍କୁ ବାଘ କବଳରୁ ରକ୍ଷା କରିଥିଲେ। ଭାଉଜକୁ ରକ୍ଷା କରିବାକୁ ଚେଷ୍ଟା କରି ସେ ମଧ୍ୟ ଆହତ ଆହତ ହୋଇଥିଲେ ।
ଭାଉଜଙ୍କୁ ବାଘ ହାବୁଡ଼ରୁ ବଞ୍ଚାଇବା ପାଇଁ ଉଭୟଙ୍କ ପ୍ରାଣମୂର୍ଛା ଉଦ୍ୟମ ସହିତ ଗ୍ରାମବାସୀଙ୍କ ତତକ୍ଷଣାତ ସହଯୋଗ ଫଳରେ ସେମାନେ ଉଦ୍ଧାର ପାଇଥିଲେ l ଗ୍ରାମବାସୀ ଗୁରୁତର ଅବସ୍ଥାରେ ସେମାନଙ୍କୁ ଉଦ୍ଧାର କରି ରାଇରଙ୍ଗପୁର ଡାକ୍ତରଖାନାକୁ ପଠାଇ ଥିବା ବେଳେ ଉଭୟ ଦିଅର ଓ ଭାଉଜ ଚିକିତ୍ସାଧୀନ ଅଛନ୍ତି l
ମୟୂରଭଞ୍ଜରୁ ସଞ୍ଜୟ କୁମାର ପରିଡା,ଇଟିଭି ଭାରତ
