ରାଇରଙ୍ଗପୁର: କିଛି ଦିନ ତଳେ ଚର୍ଚ୍ଚାକୁ ଆସିଥିଲା ବଧୂହତ୍ୟା ନେଇ ସ୍ବାମୀ ଓ ଶ୍ବଶୂରଙ୍କ ଗିରଫ କରିବା ପରେ ବଧୂ ଜୀବନ୍ତ ଉଦ୍ଧାର ଘଟଣା । ଘଟଣାରେ ସ୍ବାମୀ ଓ ଶ୍ବଶୂରଙ୍କୁ ଗିରଫ ପରେ କୋର୍ଟ ଚାଲାଣ କରିଥିଲା ବାଦାମପାହାଡ ପୋଲିସ । ପରେ କୋର୍ଟରୁ ରାଇରଙ୍ଗପୁର ଉପ କାରାଗାରକୁ ମଧ୍ୟ ପଠାଇଥିଲା ପୋଲିସ । ତେବେ ନିର୍ଦ୍ଦୋଷଙ୍କ ଗିରଫଦାରୀ ଘଟଣାରେ ଶେଷରେ ନିଲମ୍ବିତ ହୋଇଛନ୍ତି ବାଦାନପାହାଡ ଥାନା ପୂର୍ବତନ ଥାନାଧିକାରୀ ଶଶଧର ସେଠୀ ।
ପ୍ରକାଶ ଯେ ଜୁଲାଇ 27 ତାରିଖରେ ବାଦାମପାହାଡ ଥାନା ଅଧିକାରୀ ଶଶଧର ସେଠୀ ବଧୂ ରାଇମଣୀଙ୍କୁ ନେଇ କୋର୍ଟ ବୟାନ ରେକର୍ଡ କରାଇଥିଲେ । ଫଳରେ ଜେଲ୍ରୁ ରାଇମଣୀଙ୍କ ସ୍ବାମୀ ଓ ଶ୍ବଶୂର 28 ତାରିଖରେ ମୁକୁଳିଥିଲେ । ତେବେ ବିନା ଦୋଷରୁ ରାଇମଣୀଙ୍କ ସ୍ବାମୀ ଓ ଶ୍ବଶୂରଙ୍କୁ ଗିରଫ କରିବାର ପୁରସ୍କାର ସ୍ବରୂପ ଥାନା ଅଧିକାରୀଙ୍କୁ ବାରିପଦା ପୋଲିସ ହେଡ କ୍ବାର୍ଟରକୁ ବଦଳି କରାଯାଇଥିଲା ।
ଏହାପରେ ନୂତନ ଭାବେ ମୟୂରଭଞ୍ଜ ଜିଲ୍ଲାରେ ପରମାର ସ୍ମିଥ ପୁରୁଷୋତ୍ତମ ଦାସ ଏସ୍ପି ଭାବେ ଦାୟିତ୍ବ ଗ୍ରହଣ କରିବା ପରେ ଆରମ୍ଭ ହୋଇଥିଲା ଘଟଣାର ତଦନ୍ତ । ଫଳରେ ବାଦାମପାହାଡ ଥାନାର ପୂର୍ବତନ ଥାନା ଅଧିକାରୀ ଶଶଧର ସେଠୀଙ୍କୁ ନିଲମ୍ବିତ କରିଛନ୍ତି ଏସ୍ପି ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
