ରାଇରଙ୍ଗପୁର: ବହୁ ଚର୍ଚ୍ଚିତ ବାଦାମପାହାଡ଼ ଗଣଦୁଷ୍କର୍ମ ମାମଲା । ୯ ଅଭିଯୁକ୍ତଙ୍କୁ ନିର୍ଦ୍ଦୋଷରେ ଖଲାସ କରିଛନ୍ତି ରାଇରଙ୍ଗପୁର କୋର୍ଟ । ପାଞ୍ଚ ବର୍ଷ ପୂର୍ବେ ମୟୂରଭଞ୍ଜ ଜିଲ୍ଲା ବାଦାମପାହାଡ଼ରେ ଘଟିଥିଲା ଏହି ଗଣଦୁଷ୍କର୍ମ ଘଟଣା ।
ଉକ୍ତ ଘଟଣାରେ ନଅ ଜଣ ଅଭିଯୁକ୍ତକୁ ବାଦାମପାହାଡ ଥାନା ପୋଲିସ ଗିରଫ କରି କୋର୍ଟ ଚାଲାଣ କରିଥିଲେ । ତେବେ ଗତକାଲି (ଗୁରୁବାର) ରାଇରଙ୍ଗପୁର ଅତିରିକ୍ତ ଜିଲ୍ଲା ଓ ଦୌରାଜଜ୍ ଅନୁପ ରଞ୍ଜନ ପଟ୍ଟନାୟକ ୧୭ ଜଣ ସାକ୍ଷୀଙ୍କ ବୟାନ ଓ ପ୍ରମାଣ ଅଭାବରୁ ସମସ୍ତ ୯ ଜଣ ଅଭିଯୁକ୍ତଙ୍କୁ ନିର୍ଦ୍ଦୋଷରେ ଖଲାସ କରିଛନ୍ତି ।
ସୂଚନାଯୋଗ୍ୟ ଯେ, ୨୦୧୬ ମସିହା ଅକ୍ଟୋବର ମାସ ୧୨ ତାରିଖ ରାତିରେ ବାଦାମପାହାଡ଼ରେ ଅନୁଷ୍ଠିତ ହୋଇଥିବା ଦୁର୍ଗାପୂଜା ଯାତ୍ରାରୁ ଜଣେ ବାଳିକାକୁ ଅପହରଣ କରି ଗଣଦୁଷ୍କର୍ମ ହୋଇଥିଲା । ପରିବାର ଲୋକଙ୍କ ପକ୍ଷରୁ ଏ ନେଇ ଅଭିଯୋଗ ହୋଇଥିଲା । ଅଭିଯୋଗରେ ବାଦାମପାହାଡ ଅଞ୍ଚଳର ଆଠ ଜଣ ଓ ଜାମଦା ଅଞ୍ଚଳର ଜଣେ ଯୁବକଙ୍କୁ ପୋଲିସ ଗିରଫ କରିଥିଲା ।
ତେବେ ପ୍ରମାଣ ଅଭାବରୁ ସମସ୍ତ ଅଭିଯୁକ୍ତଙ୍କୁ ଅଦାଲତ ନିର୍ଦ୍ଦୋଷରେ ଖଲାସ କରିଛନ୍ତି । ସେପଟେ ଅଭିଯୁକ୍ତଙ୍କ ପକ୍ଷରୁ ଉକ୍ତ ମକଦ୍ଦମାକୁ ବରିଷ୍ଠ ଓକିଲ ରାମ ଚନ୍ଦ୍ର ସାହୁ ଓ ଇନ୍ଦ୍ରଜିତ ସେନଗୁପ୍ତା ପରିଚାଳନା କରୁଥିଲେ ।
ମୟୂରଭଞ୍ଜ ରାଇରଙ୍ଗପୁରରୁ ସଞ୍ଜୟ କୁମାର ପରିଡା,ଇଟିଭି ଭାରତ
